काठमाडाैँ । नेपाल सरकारका प्रवक्ता एवं शिक्षा तथा खेलकुदमन्त्री सस्मित पोखरेलले अर्थ मन्त्रालय र अर्थमन्त्रीसँग सम्बन्धित विषयहरूबारे उठेका प्रश्नमा सरकारको धारणा स्पष्ट पार्नुभएको छ।
मन्त्री पोखरेलका अनुसार अर्थमन्त्रीले आफूमाथि उठेका प्रश्नहरूको जवाफ संघीय संसद र संसदीय समितिमा पहिले नै दिइसक्नुभएको छ। उहाँले अर्थमन्त्रीको उक्त स्पष्टीकरण पर्याप्त रहेको उल्लेख गर्दै हालका लागि थप कुनै प्रक्रिया आवश्यक नरहेको बताउनुभयो। साथै, आवश्यकता परेमा विगतमा जस्तै प्रधानमन्त्री र मन्त्रिपरिषद्ले उपयुक्त निर्णय लिने पनि उहाँले स्पष्ट पार्नुभयो।
उहाँले भन्नुभयो, “अर्थमन्त्रीज्युले सदन र समितिमा यसबारे स्पष्ट पारिसक्नुभएको छ। हाललाई योभन्दा बाहेक थप केही गर्नुपर्ने आवश्यकता सरकारले महसुस गरेको छैन।”
त्यसैगरी, विधेयक निर्माण तथा कानून संशोधनसम्बन्धी विषयमा बोल्दै मन्त्री पोखरेलले सम्बन्धित मन्त्रालयहरूबाट प्राप्त प्रस्तावहरू मन्त्रिपरिषद्मा छलफल भई पारित भएपछि मात्र औपचारिक रूपमा जानकारी दिइने बताउनुभयो।
यसैबीच, माध्यमिक शिक्षा परीक्षा (एसईई) सँग सम्बन्धित अनियमितताका प्रसङ्गमा मन्त्री पोखरेलले हालसम्म मन्त्रालयमा कुनै औपचारिक जानकारी नआएको स्पष्ट पार्नुभएको छ। यद्यपि, परीक्षा सञ्चालनमा कुनै कमजोरी वा अनियमितता भेटिएमा संलग्न जो–कोहीमाथि छानबिन गरी आवश्यक कारबाही गरिने उहाँले प्रतिबद्धता जनाउनुभयो।
