काठमाडौं । प्रमुख प्रतिपक्ष दल नेपाली कांग्रेसका संसदीय दलका नेता भीष्मराज आङदेम्बेले अब उप्रान्त प्रधानमन्त्री बालेन्द्र साहको उपस्थितिलाई लिएर संसद अवरोध नगर्ने बताएका छन्।
बुधबार प्रतिनिधि सभाको बैठकमा बोल्दै नेता आङदेम्बेले प्रधानमन्त्रीको उपस्थितिभन्दा देशका समस्याहरू बढी महत्वपूर्ण र संवेदनशील रहेको उल्लेख गर्दै संसदको अमूल्य समय त्यसैमा केन्द्रित हुनुपर्ने धारणा राखे।
उनले बजेटमाथिको छलफलसहित जनतासँग प्रत्यक्ष सरोकार राख्ने थुप्रै विषयमा संसदमा बहस गर्न बाँकी रहेको भन्दै प्रधानमन्त्रीलाई खोज्ने नाममा संसदलाई अल्झाइराख्नु उचित नहुने बताए।
आङदेम्बेले प्रधानमन्त्री साहलाई संसदको महत्व नलाग्न सक्ने भए पनि प्रतिपक्षका लागि संसद अपरिहार्य रहेको उल्लेख गरे। साथै, प्रधानमन्त्रीले विगतमा जस्तै फेरि पनि ‘छापामार शैली’मा संसदमा उपस्थित भई असहज परिस्थिति सिर्जना गर्न सक्ने आशंका आफूमा रहेको बताए।
“अब म प्रधानमन्त्रीलाई खोज्न चाहन्न। किनभने मुलुकका समस्या र जनताका प्रश्नहरू उहाँको उपस्थितिभन्दा पनि ठूला र संवेदनशील छन्,” उनले भने।
यद्यपि, प्रधानमन्त्रीले सार्वजनिक रूपमा व्यक्त गरेका विषयवस्तु तथा संसदप्रतिको जिम्मेवारीका सवालमा प्रतिपक्षको खबरदारी भने निरन्तर रहने उनले स्पष्ट पारे।
आङदेम्बेले संसदलाई जनताका जीवन्त मुद्दामाथि केन्द्रित गरिनुपर्नेमा जोड दिँदै राजनीतिक दलहरूले जिम्मेवार र परिपक्व भूमिका निर्वाह गर्नुपर्ने आवश्यकता औंल्याए।
