काठमाडाैँ । स्व. राजा वीरेन्द्र शान्ति प्रतिष्ठानले सरकारद्वारा दरबार हत्याकाण्डबारे थप छानबिन गर्ने निर्णयलाई स्वागतयोग्य कदमका रूपमा लिएको छ।
प्रतिष्ठानले मंगलबार गृह मन्त्रालयको नेतृत्व सम्हाल्दै गृहमन्त्रीले २०५८ जेठ १९ गते भएको नारायणहिटी दरबार हत्याकाण्डबारे पुनः अध्ययन गरी थप छानबिन प्रक्रिया अघि बढाउने निर्णय गरेकोप्रति आभार व्यक्त गरेको छ। प्रतिष्ठानले यसलाई लामो समयपछि इतिहासको संवेदनशील र गम्भीर घटनाबारे सत्यतथ्य उजागर गर्ने दिशामा उठाइएको साहसिक र सकारात्मक कदम भनेको छ।
स्व. राजा वीरेन्द्र शान्ति प्रतिष्ठान ले स्थापनाकालदेखि नै दरबार हत्याकाण्डको निष्पक्ष छानबिनको माग गर्दै आएको उल्लेख गर्दै यस निर्णयलाई संस्थागत उद्देश्यसँग मेल खाने महत्वपूर्ण उपलब्धि भएको जनाएको छ।
प्रतिष्ठानले पुनः छानबिनमार्फत कुनै पनि राजनीतिक पूर्वाग्रह, बाह्य वा आन्तरिक प्रभावबाट मुक्त रही वैज्ञानिक र निष्पक्ष ढंगले वास्तविक तथ्य सार्वजनिक हुने अपेक्षा व्यक्त गरेको छ। साथै, यस प्रक्रियाका लागि नयाँ छानबिन आयोग गठन गरी छिटो र पारदर्शी निष्कर्षमा पुग्नुपर्ने पनि माग गरेको छ।
वक्तव्यमा राजा वीरेन्द्रले विश्व शान्तिका लागि पुर्याएको योगदानको स्मरण गर्दै उहाँको नाममा शान्ति स्तम्भ निर्माण तथा सम्पत्ति संरक्षणका पहललाई निरन्तरता दिने प्रतिबद्धता पनि व्यक्त गरिएको छ।
प्रतिष्ठानले सरकारबाट गरिएको यो निर्णय केवल घोषणा मात्र नभई व्यवहारिक रूपमा छिटो निष्कर्षमा पुग्ने गरी अघि बढोस् भन्ने जोडदार आग्रह गरेको छ।
