काठमाडाैँ । निर्वाचन आयोगले विभिन्न स्थानीय तहमा निर्वाचित आठ जना वडा अध्यक्षले दल त्याग गरी अन्य राजनीतिक दलमा प्रवेश गरेको भन्दै उनीहरूको पद स्वतः रिक्त भएको जनाएको छ।
आयोगले बुधबार सूचना प्रकाशित गर्दै राजनीतिक दलसम्बन्धी ऐन, २०७३ को दफा ३२(१) तथा राजनीतिक दलसम्बन्धी नियमावली, २०७४ को नियम २२ बमोजिम नेपाल कम्युनिष्ट पार्टी (एकीकृत मार्क्सवादी–लेनिनवादी) (एमाले) को केन्द्रीय सचिवालयबाट प्राप्त जानकारीका आधारमा मिति २०८३ जेठ २६ गते पद रिक्त भएको निर्णय गरेको जनाएको हो।
आयोगका अनुसार २०७९ सालको स्थानीय तह निर्वाचनबाट एमालेका तर्फबाट निर्वाचित भएका ती जनप्रतिनिधिहरू अन्य दलमा प्रवेश गरेको व्यहोरा पार्टीको केन्द्रीय समितिले आयोगलाई जानकारी गराएको थियो। सोही आधारमा सम्बन्धित पदहरू स्वतः रिक्त भएको घोषणा गरिएको हो।
पद रिक्त हुने जनप्रतिनिधिहरूमा कोशी प्रदेशको ओखलढुंगास्थित मोलुङ गाउँपालिका–१ का वडा अध्यक्ष कमलबहादुर बानियाँ, मोलुङ गाउँपालिका–६ का वडा अध्यक्ष कमल तामाङ तथा चम्पादेवी गाउँपालिका–७ का वडा अध्यक्ष सुरेश कुमार थापा रहेका छन्।
त्यसैगरी, लुम्बिनी प्रदेशको पाल्पास्थित माथागढी गाउँपालिका–१ का वडा अध्यक्ष राजकुमार पन्थी, बागमती प्रदेशको ललितपुरस्थित बागमती गाउँपालिका–७ का वडा अध्यक्ष होमप्रसाद बजगाई, कोशी प्रदेशको मोरङस्थित लेटाङ नगरपालिका–४ का वडा अध्यक्ष रामकुमार श्रेष्ठ तथा रंगेली नगरपालिका–१ का वडा अध्यक्ष महेश कुमार खनालको पद पनि रिक्त भएको आयोगले जनाएको छ।
यस्तै, लुम्बिनी प्रदेशको दाङस्थित घोराही उपमहानगरपालिका–४ का वडा अध्यक्ष मधुसूदन शर्माको पद समेत रिक्त भएको सूचनामा उल्लेख छ।
निर्वाचन आयोगले सम्बन्धित सबै निकाय तथा सरोकारवालाको जानकारीका लागि उक्त सूचना सार्वजनिक गरेको जनाएको छ।
