काठमाडौं । मन्त्रिपरिषद् बैठकहरू प्रायः नीति, योजना र निर्णयका कारण चर्चामा रहने गर्छन्। तर मंगलबारको बैठकमा भने एक फरक दृश्य देखियो। बैठकको औपचारिक एजेन्डाबीच मन्त्रीहरूको टेबलमा दूध, चिज र पेडा पुगेपछि केहीबेर वातावरण नै फरक बन्यो।
यी परिकार कुनै विशेष भोजका लागि थिएन स्वदेशी दुग्ध उत्पादनको प्रवर्द्धन र किसानको मनोबल बढाउने उद्देश्यसहित प्रस्तुत गरिएको सन्देशका रूपमा वितरण गरिएको थियो। कृषि तथा पशुपन्छी विकास मन्त्री गीता चौधरीले सरकारी स्वामित्वको दुग्ध विकास संस्थान (डीडीसी) का उत्पादन प्रधानमन्त्री तथा मन्त्रिपरिषद्का सदस्यहरूलाई उपलब्ध गराएकी थिइन्।
दुग्ध क्षेत्र पछिल्लो समय उत्पादन, बजारीकरण र भुक्तानीलगायतका चुनौतीसँग जुधिरहेको अवस्थामा सरकारले आफ्नै उत्पादनको प्रयोगमार्फत सकारात्मक सन्देश दिन खोजेको बुझिएको छ। बैठकमा सहभागी मन्त्रीहरूले डीडीसीका उत्पादनको स्वाद लिँदै स्वदेशी वस्तुको प्रयोग बढाउनुपर्ने आवश्यकता औँल्याएका थिए।
सरकारले किसानको उत्पादनको बजार सुनिश्चित गर्न र स्वदेशी उद्योगलाई बलियो बनाउन विभिन्न योजना अघि सारिरहेका बेला मन्त्रिपरिषद् बैठकमै डीडीसीका परिकार पुग्नु केवल खाजाको विषय नभई एउटा प्रतीकात्मक कदमका रूपमा हेरिएको छ।
