काठमाडाैँ । नेकपा एमालेकी सांसद मिनान्सी रखालले प्रधानमन्त्री बालेन्द्र शाह (बालेन शाह)ले सीमा सम्बन्धी दिएको अभिव्यक्तिबारे माफी माग्दै राजीनामा दिने साहस देखाउनुपर्ने बताउनुभएको छ।
मंगलबार बसेको राष्ट्रियसभाको बैठकमा बोल्दै उहाँले प्रधानमन्त्रीको “नेपालले भारतको पनि भूमि मिचेको रहेछ” भन्ने अभिव्यक्ति राष्ट्रियता, सार्वभौमिकता तथा कूटनीतिक संवेदनशीलताविपरीत रहेको टिप्पणी गर्नुभयो।
सांसद रखालका अनुसार नेपालको भूमि, सीमा र राष्ट्रिय स्वाभिमानसँग सम्बन्धित विषय ऐतिहासिक तथ्य, प्रमाण, नक्सा, सन्धि–सम्झौता र राष्ट्रिय सहमतिसँग जोडिएको विषय भएकाले व्यक्तिगत अनुमान वा धारणाका आधारमा सार्वजनिक अभिव्यक्ति दिन नहुने बताउनुभयो। उहाँले प्रधानमन्त्रीको उक्त अभिव्यक्तिले देशभित्र मात्र नभई अन्तर्राष्ट्रिय स्तरमा समेत असर पार्न सक्ने जोखिम रहेको दाबी गर्नुभयो।
कालापानी, लिपुलेक र लिम्पियाधुरासहितका नेपाली भूभागबारे राजनीतिक दल, संसद र आम नेपालीबीच साझा राष्ट्रिय अडान रहेको उल्लेख गर्दै उहाँले प्रधानमन्त्रीको अभिव्यक्तिले नेपालको आधिकारिक धारणा कमजोर बनाउन सक्ने भन्दै आपत्ति जनाउनुभयो।
यदि प्रधानमन्त्रीको भनाइ तथ्यमा आधारित हो भने त्यससम्बन्धी आधिकारिक प्रमाण संसद र जनतासमक्ष प्रस्तुत गर्नुपर्ने उहाँको माग छ। साथै, यदि अभिव्यक्ति असावधानीवश आएको हो भने तत्काल फिर्ता लिएर स्पष्टिकरण र क्षमायाचना गर्नुपर्ने उहाँले बताउनुभयो।
उहाँले प्रधानमन्त्रीले आफ्नो अभिव्यक्तिको नैतिक जिम्मेवारी वहन गर्दै जनताको विश्वास पुनःस्थापित गर्न आवश्यक रहेको उल्लेख गर्नुभयो। आवश्यक परे पदबाट राजीनामा दिनेसम्मको साहस देखाउनुपर्ने उहाँको भनाइ छ।
सांसद रखालले प्रधानमन्त्रीको अभिव्यक्ति फिर्ता लिएर संसद सञ्चालनको वातावरण बनाउनुपर्नेमा जोड दिँदै राष्ट्रियता कुनै दल, व्यक्ति वा सरकारभन्दा माथिको विषय भएको पनि स्पष्ट पार्नुभयो।
