काठमाडाैँ । श्रम संस्कृति पार्टीका अध्यक्ष हर्कराज राईले प्रधानमन्त्री बालेन्द्र साहले नेपालले पनि भारतको सीमा मिचेको भन्ने अभिव्यक्तिप्रति आपत्ति जनाउँदै प्रधानमन्त्री स्वयंले त्यसको तथ्यगत पुष्टि गर्नुपर्ने बताउनुभएको छ ।
प्रतिनिधि सभाको सोमवारको बैठकमा बोल्दै उहाँले यस्तो बताउनुभएको हो । उहाँले अन्यथा नेपाली जनतासमक्ष आफ्नो भनाइ सच्याउनुपर्ने उहाँको भनाइ छ ।
राईले प्रधानमन्त्रीको अभिव्यक्ति नसच्याइएसम्म अन्य विषयमा बहस गर्नु अर्थहीन हुने टिप्पणी गर्दै राष्ट्रिय भूगोल र सार्वभौमिकताको रक्षा राज्यको पहिलो दायित्व भएको बताउनु भयो ।
उहाँले प्रधानमन्त्री शाहको अभिव्यक्तिले राष्ट्रिय स्वाभिमान र सीमासम्बन्धी संवेदनशील विषयमा अनावश्यक अन्योल सिर्जना गरेको दाबी गर्नुभयो । उहाँले नेपाली भूमिमा सेना तैनाथ गर्न समेत सरकारको ध्यानाकर्षण गराउनु भयो ।
उहाँले भन्नुभयो, ‘उहाँले हाम्रो सीमानाको बारेमा हाम्रो देशले छिमेकी मुलुकलाई कहाँ कहाँ अतिक्रमण गरेको हो भन्नेबारे पुष्टि गर्नुपर्छ । होइन भने नेपाली जनतालाई सम्बोधन गरेर आफ्नो भनाई सच्याउनुपर्छ । त्यो कुरा नसच्चिएसम्म अर्को विषयमा प्रवेश गर्नु मिथ्या रहन्छ किनभने देश र रहनको भूगोल चाहिन्छ । भूगोल बिनाको देश हुँदैन । आफ्नो मुलुकको भुगोलको रक्षा गर्नुको सट्टा प्रधानमन्त्रीज्यूले जे अभिव्यक्ति दिनुभयो त्यसले हामी आन्दोलित छौँ, आक्रोशित छौँ । उहाँ आफैंले आफ्नो अभिव्यक्ति सच्याउनुपर्छ ।’
प्रधानमन्त्री साहले प्रतिनिधि सभाको बैठकलाई सम्बोधन गर्नेक्रममा भारतले नेपालको भूमि मात्र नभई नेपालले समेत भारतको भूमि अतिक्रमण गरेको विवादित अभिव्यक्ति दिनुभएको थियो ।
