काठमाडौं । प्रतिनिधिसभाको प्रतिपक्षी दल नेकपा (एमाले) ले राष्ट्रिय स्वतन्त्र पार्टी (रास्वपा) का सभापति रवि लामिछानेको हालैको भारत भ्रमण र प्रधानमन्त्री बालेन शाहको सार्वजनिक अभिव्यक्तिबीच कुनै तादम्यता थियो वा थिएन भन्ने प्रश्न उठाएको छ।
सिंहदरबारमा सोमबार बसेको सर्वदलीय बैठकमा एमालेले उक्त विषय उठाएको हो। बैठकमा रास्वपा सभापति लामिछाने स्वयं उपस्थित थिए। उनले आफ्नो भारत भ्रमणबारे दलहरूलाई जानकारी गराएका थिए र उठेका प्रश्नहरूको जवाफ समेत दिएका थिए।
एमालेका प्रमुख सचेतक ऐन महरका अनुसार, बैठकमा पार्टीको तर्फबाट भ्रमण र राजनीतिक अभिव्यक्तिबीच सम्भावित सम्बन्धबारे प्रश्न गरिएको थियो।
“प्रधानमन्त्रीको स्टेटमेन्ट र तपाईंको भारत भ्रमणबीच तादम्यता थियो कि थिएन ? यस्ता विषय उठे कि उठेनन् ? भनेर हामीले कुरा राख्यौं,” महरले बैठकपछि बताए।
बैठकमा सीमा विवादसम्बन्धी विषय पनि उठाइएको एमालेले जनाएको छ। भारत भ्रमणका क्रममा सीमा अतिक्रमणबारे छलफल भयो कि भएन भन्ने प्रश्न समेत रास्वपा सभापतिसँग गरिएको थियो।
“अहिले पनि भारतले सीमा मिचिरहेको छ। उहाँ भारत भ्रमणमा हुँदा पनि मिचिएको अवस्था थियो। यसबारे छलफल भयो कि भएन भनेर सोध्यौं,” महरले थपे।
त्यसैगरी, एमालेले ईपीजी (प्रबुद्ध व्यक्ति समूह) प्रतिवेदन कार्यान्वयनसम्बन्धी विषयमा पनि बैठकमा प्रश्न उठाएको जनाएको छ।
