काठमाडाैँ । रसुवागढी नाकामा भन्सार बिन्दुमा नआएका सवारीसाधनको समेत भन्सार जाँचपास भएको विषयमा छानबिन अघि बढेपछि अर्थ मन्त्रालयले प्रमुख भन्सार अधिकृतसहित ९ जना कर्मचारीलाई जिम्मेवारीबाट हटाएर भन्सार विभागमा तानेको छ।
अर्थमन्त्री स्वर्णिम वाग्लेका स्वकीय उपसचिव तथा जनसम्पर्क सल्लाहकार नवीन ढुंगानाका अनुसार मन्त्रालयले गठन गरेको छानबिन समितिको प्रारम्भिक प्रतिवेदनका आधारमा उनीहरूलाई थप अनुसन्धानका लागि सरुवा गरिएको हो। जेठ २० गते रसुवागढी भन्सार कार्यालयका प्रमुखसहित ९ जना कर्मचारीलाई जिम्मेवारीमुक्त गर्दै विभागमा तानिएको उनले जानकारी दिएका छन्।
ढुंगानाका अनुसार घटनाबारे थप अनुसन्धान प्रक्रिया जारी छ। उनका भनाइमा मुस्ताङको कोरला नाकाबाट भन्सार जाँचपास भएका कारको विषयमा पनि छुट्टै छानबिन भइरहेको छ। अर्थ मन्त्रालय र भन्सार विभागका उपसचिव, नेपाल प्रहरी तथा सशस्त्र प्रहरीसहितको संयुक्त टोली हाल स्थलगत रूपमा अनुसन्धानमै रहेको उनले बताए।
प्रारम्भिक चरणमा भन्सार छलीको आशंका गरिएका केही सवारीसाधन नियन्त्रणमा लिइएको र सम्बन्धित आयातकर्ता कम्पनीमाथि पनि अनुसन्धान अघि बढाइएको जानकारी दिइएको छ। विस्तृत विवरण अनुसन्धानपछि सार्वजनिक गरिने बताइएको छ।
यसैबीच, छानबिन चलिरहेकै अवस्थामा अर्थमन्त्री र मन्त्रालयका अधिकारीहरूको चरित्र हत्या गर्ने तथा गलत धारणा फैलाउने प्रयास भइरहेको आरोप पनि अर्थमन्त्रीका स्वकीय उपसचिव ढुंगानाले लगाएका छन्। यस्ता गतिविधिमा संलग्न केही व्यक्तिमाथि कानुनी प्रक्रिया अघि बढाइएको र थप कारबाहीको तयारी भइरहेको उनको भनाइ छ।
उनले अर्थ मन्त्रालयसँग सम्बन्धित विषयमा टिप्पणी गर्दा जिम्मेवार स्रोतबाट तथ्य जाँच गर्न र भन्सार तथा बजेटजस्ता प्राविधिक विषयमा सत्य जानकारीका आधारमा मात्र समाचार प्रकाशन गर्न आग्रह समेत गरेका छन्।
