काठमाडौँ । राष्ट्रिय स्वतन्त्र पार्टीका सांसद तथा पूर्व गृहमन्त्री सुधन गुरुङमाथि गठन गरिएको छानबिन समितिले आफ्नो प्रतिवेदन सरकारलाई बुझाएको छ । समितिका संयोजक पूर्वन्यायाधीश अच्युतप्रसाद भण्डारीले निर्धारित समयअघि नै प्रतिवेदन बुझाइएको जानकारी दिएका छन् ।
भण्डारीका अनुसार प्रधानमन्त्री बालेन्द्र (बालेन) शाहसमक्ष ४५ पृष्ठ लामो प्रतिवेदन पेश गरिएको हो । उनले प्रतिवेदन यथाशीघ्र सार्वजनिक गर्न सुझाव समेत दिएको बताएका छन् ।
स्रोतका अनुसार प्रतिवेदनमा गुरुङको बयान मात्र १७ पृष्ठ समेटिएको छ । समितिले आरोपसँग सम्बन्धित विभिन्न पक्षसँग सोधपुछ गर्नुका साथै सम्पत्ति विवरण र अन्य कागजातको अध्ययन गरेर प्रतिवेदन तयार गरेको बताइएको छ ।
मन्त्रिपरिषद्को २८ वैशाखको निर्णयअनुसार उच्च अदालतका पूर्वन्यायाधीश अच्युतप्रसाद भण्डारीको नेतृत्वमा समिति गठन गरिएको थियो । समितिमा महालेखा नियन्त्रक शोभाकान्त पौडेल र सहन्यायाधिवक्ता अच्युतमणि नेउपाने सदस्य रहेका थिए ।
गुरुङ र व्यवसायी दीपक भट्टबीच व्यावसायिक साझेदारी रहेको विषय सार्वजनिक भएपछि छानबिन प्रक्रिया अघि बढाइएको थियो । साथै, सम्पत्ति विवरण सार्वजनिक गर्ने क्रममा सेयर स्वामित्व लुकाएको आरोपसमेत गुरुङमाथि लागेको थियो । आरोप सार्वजनिक भएपछि उनले वैशाख ९ गते मन्त्री पदबाट राजीनामा दिएका थिए ।
