काठमाडौं । नेकपा एमालेका महासचिव शंकर पोखरेलले पार्टीभित्र देखिएका चुनौती र समस्याको समाधान सम्भव रहेको बताएका छन्। सामाजिक सञ्जालमार्फत धारणा सार्वजनिक गर्दै उनले निर्वाचन परिणामले जनतासँगको सम्बन्ध कमजोर भएको देखाएको उल्लेख गरेका छन्।
पोखरेलले जनतासँगको सम्बन्ध पुनः मजबुत बनाउन खुला आत्मसमीक्षा, कमजोरीको स्वीकारोक्ति, एकता र अनुशासन अपरिहार्य रहेको बताएका छन्। उनले पार्टीभित्र आवश्यक सुधार र पुनर्गठनका लागि संस्थागत तथा विधिसम्मत प्रक्रियालाई आधार बनाउनुपर्नेमा जोड दिएका छन्।
“पार्टीका सामु चुनौती छन्, तर तिनको सामना गर्न सकिन्छ। समस्या छन्, समाधान गर्न सकिन्छ,” उनले लेखेका छन्। साथै उनले पार्टीभित्रका सबै काम संस्थागत प्रक्रियाबाट अघि बढे मात्र अपेक्षित सफलता हासिल गर्न सकिने बताएका छन्।
