काठमाडाैँ । नेपाल स्वास्थ्य बीमा बोर्डद्वारा निजी सेवा प्रदायक स्वास्थ्य संस्थाहरूलाई स्वास्थ्य बीमा कार्यक्रमअन्तर्गत आकस्मिक उपचारसम्बन्धी सेवा प्रावधानलाई स्पष्ट पार्दै नयाँ निर्देशन जारी गरिएको छ।
बबरमहलस्थित बोर्डले जारी गरेको पत्रमार्फत निजी स्वास्थ्य संस्थाहरूलाई आकस्मिक स्वास्थ्य सेवा प्रदान गर्ने सन्दर्भमा स्पष्ट मापदण्ड पालना गर्न आग्रह गरेको हो। बोर्डका अनुसार आकस्मिक प्रकृतिका बिरामीलाई मात्र आवश्यक परेमा आकस्मिक सेवा अन्तर्गत उपचार उपलब्ध गराउनुपर्नेछ। त्यस्ता बिरामीलाई उपचारका क्रममा अस्पताल भर्ना वा शल्यक्रिया आवश्यक परेमा चिकित्सकीय प्रक्रिया अनुसार सेवा प्रदान गरी डिस्चार्ज गर्न सकिने व्यवस्था गरिएको छ।
तर सामान्य प्रकृतिका बिरामीलाई आकस्मिक सेवा अन्तर्गत उपचार प्रदान गरी दाबी पेश गरिएमा त्यस्ता दाबीहरूको भुक्तानी नहुने तथा प्रचलित कानुनअनुसार आवश्यक कारबाही हुने स्पष्ट पारिएको छ।
साथै, बोर्डले सेवाग्राहीहरूलाई समेत लक्षित गर्दै स्वास्थ्य सेवा प्रदायक संस्था तथा स्वास्थ्यकर्मीमाथि अनावश्यक दबाब सिर्जना नगर्न आग्रह गरेको छ। सेवाग्राहीलाई तोकिएबमोजिम आवश्यक उपचार सेवा प्राप्त गरी स्वास्थ्य सेवा प्रणालीलाई व्यवस्थित बनाउन सहयोग गर्न अनुरोध गरिएको छ।
स्वास्थ्य बीमा बोर्डले यस सूचनाको बोधार्थ स्वास्थ्य बीमा बोर्डको दाबी व्यवस्थापन शाखालाई समेत पठाएको जनाएको छ।
