काठमाडौं । प्रधानमन्त्री बालेन्द्र शाहले संसद्मा दिएको अभिव्यक्तिलाई लिएर नेकपा एमालेले कडा आपत्ति जनाएको छ । प्रतिनिधिसभाको सोमबारको बैठकमा बोल्दै एमाले प्रमुख सचेतक ऐनबहादुर महरले प्रधानमन्त्रीले आफ्नो भनाइ सच्याउँदै सार्वजनिक रूपमा माफी माग्नुपर्ने माग गरेका हुन् ।
महरले नेपालको भूमि सम्बन्धी विषयमा प्रधानमन्त्रीले दिएको अभिव्यक्ति तथ्यहीन र राष्ट्रिय हितविपरीत भएको दाबी गरे । उनले लिपुलेक, लिम्पियाधुरा, कालापानी र सुस्ता नेपालको भूभाग भएको उल्लेख गर्दै नेपालले कुनै पनि छिमेकी मुलुकको भूमि अतिक्रमण नगरेको बताए ।
सदनलाई सम्बोधन गर्दै उनले संविधान, संघीय लोकतान्त्रिक गणतन्त्र र संसद्को गरिमामाथि कसैले पनि प्रश्न उठाउन नहुने धारणा राखे । प्रधानमन्त्रीको अभिव्यक्तिले नेपाली नागरिकको आत्मसम्मानमा चोट पुगेको उनको भनाइ थियो ।
महरले प्रधानमन्त्रीको भनाइबाट भारतीय सञ्चारमाध्यमहरूमा सकारात्मक प्रतिक्रिया आएको उल्लेख गर्दै त्यसले राष्ट्रिय स्वाभिमान कमजोर बनाएको आरोप लगाए । उनले प्रधानमन्त्रीको अभिव्यक्तिको समय र सन्दर्भमाथि समेत प्रश्न उठाए ।
यसैबीच उनले प्रधानमन्त्रीको संसद्मा उपस्थित हुँदाको पोषाकप्रति पनि असन्तुष्टि व्यक्त गरे । संसद् मर्यादित संस्था भएकाले त्यहाँको गरिमाअनुसारको आचरण र प्रस्तुति आवश्यक रहेको उनको भनाइ थियो ।
एमालेले प्रधानमन्त्रीले आफ्नो अभिव्यक्ति फिर्ता लिएर देशवासीसँग माफी नमागेसम्म संसद्मा विरोधका कार्यक्रमलाई निरन्तरता दिने चेतावनी समेत दिएको छ ।
