काठमाडाैंः राजश्व अनुसन्धान विभागले झुट्टा तथा नक्कली विजक प्रयोग गरी राजस्व छलि गरेको अभियोगमा नेपाल दोङ्गह्वा कन्स्ट्रक्सन इन्जिनियरिङ्ग कम्पनी प्रा.लि. विरुद्ध काठमाडौं जिल्ला अदालतमा मुद्दा दायर गरेको छ ।
तीन जना विदेशी नागरिक समेत संचालक रहेको यस कम्पनीमाथि रू १३ करोड १३ लाख बिगो कायम गरी मुद्दा दायर गरिएको विभागले जनाएको छ । विभागले संचालकमाथि बिगोको दोब्बर जरिवाना र तीन वर्षसम्मको कैद सजाय समेत मागदाबी गरेको छ ।
कम्पनीले वस्तु तथा सेवा खरिद नै नगरी झुठ्ठा तथा नक्कली मूल्य अभिवृद्धि कर विजक मात्र खरिद गरी मूल्य अभिवृद्धि कर र आयकर छलेको अनुसन्धानबाट खुलेको थियो । मूल्य अभिवृद्धि करतर्फ रु ४ करोड २१ लाख, आयकर तर्फ रु ७ करोड ७८ लाख र भएको आय लुकाई कानून बमोजिम मुनाफा वितरण गर्दा लाग्ने लाभांश कर तर्फ रु १ करोड १४ लाख राजस्व चुहावट गरेको विभागको भनाई छ ।
राजश्व हिनामिनाको कसुरमा कम्पनीका विदेशी संचालकहरू याङ लिन, शे श्याङजुन र वे देगुइ तथा सुविन श्रेष्ठ विरुद्ध बिगोको दोब्बरसम्म जरिवाना गरी ३ वर्षसम्म कैद सजाय गर्न माग गरिएको विभागले जनाएको छ ।
