कैलाली। कैलालीको लम्कीचुहा प्रादेशिक अस्पतालको उद्घाटन गरिएसँगै सञ्चालनमा आएको छ । आज यहाँ आयोजित एक कार्यक्रममा सुदूरपश्चिम प्रदेशका मुख्यमन्त्री कमलबहादुर शाहले अस्पतालको उद्घाटन गर्नुभएको हो ।
मुख्यमन्त्री शाहले जनताको स्वास्थ्यसँग कसैले पनि खेलबाड गर्न नहुने स्पष्ट पार्दै कैलालीको टीकापुर र सेती तथा कञ्चनपुरको महाकाली प्रादेशिक अस्पताललाई थप स्तरोन्नति गरी १०० श्ययाा विस्तार गरिने जानकारी दिनुभयो । प्रादेशिक अस्पतालमा डायलासिस सेवाको विस्तार गरिने उल्लेख गर्दै उहाँले लम्कीचुहा प्रादेशिक अस्पतालमा यसै वर्षदेखि डायलासिस सेवा सुरु गर्ने घोषणा गर्नुभयो ।
मुख्यमन्त्री शाहले लम्कीचुहा प्रादेशिक अस्पताल सञ्चालनमा आएसँगै ट्रमासेन्टर स्थापना गर्ने बाटो खुलेको बताउनुभयो । उहाँले ५० श्ययाभन्दा कमका अस्पतालमा ट्रमासेन्टर सञ्चालन गर्न कठिन हुने भएकाले प्रादेशिक अस्पतालको संरचना आवश्यक भएको स्पष्ट पार्नुभयो ।
प्रदेश सरकारले प्रदेश गठन आदेशअनुसार प्रादेशिक अस्पताल व्यवस्थापन समिति गठन गरेको जानकारी दिँदै मुख्यमन्त्री शाहले सो निर्णयविरुद्ध लम्कीचुहा नगरपालिका सर्वोच्च अदालत पुगेको र सर्वोच्चले अन्तरिम आदेश दिन अस्वीकार गरेको प्रसङ्ग पनि उल्लेख गर्नुभयो । अदालतको निर्णयपछि पनि स्थानीय तहबाट सहकार्यको वातावरण नबनाइएकोप्रति उहाँले असन्तुष्टि व्यक्त गर्नुभयो ।
सुदूरपश्चिम प्रदेश सरकारले आव २०८०÷८१ देखि प्रदेश मातहत रहेका अस्पतालको स्तरोन्नति र क्षमता अभिवृद्धि गर्ने नीति अवलम्बन गर्दै बाजुराको कोल्टी, दार्चुलाको गोकुलेश्वर, डडेल्धुराको जोगबुढा र कैलालीको लम्कीचुहा अस्पताललाई प्रदेशस्तरीय अस्पतालका रूपमा विकास गर्ने लक्ष्य लिएको थियो ।
उक्त नीतिअनुसार सरकारले आवश्यक बजेट विनियोजन गरिएको थियो । आव २०८२÷८३ मा सोही नीतिलाई निरन्तरता दिँदै अस्पतालको स्तरोन्नति प्रक्रिया अघि बढाइएको हो । पहिलो चरणमा डडेल्धुराको जोगबुढा र कैलालीको लम्कीचुहा अस्पताललाई प्रादेशिक अस्पतालका रूपमा स्तरोन्नति गरिएको हो ।
लम्कीचुहा नगरपालिकाले १५ श्ययाको अस्पताललाई ५० श्ययामा विस्तार गर्न औपचारिक सिफारिस गरेपछि प्रदेश सरकारले प्रक्रिया अघि बढाएको थियो । विसं २०८२ जेठ २६ गते नेपाल सरकार मन्त्रिपरिषद्ले प्रदेश सरकारमार्फत सञ्चालन गर्न स्वीकृति प्रदान गरेको थियो ।
प्रदेश सरकारले पटकपटक लम्कीचुहा नगरपालिकालाई सम्झौताका लागि पत्राचार गर्दा पनि पालिकाको व्यवस्था र अवरोधका कारण प्रादेशिक अस्पताल सञ्चालन र सेवा विस्तारमा ढिलाइ भइरहेको थियो । यसैबीच, डडेल्धुराको जोगबुढा अस्पताल भने स्थानीय तहसँग समयमै सम्झौता भई सञ्चालनमा आइसकेको छ ।
सुदूरपश्चिम प्रदेश सरकारले प्रादेशिक अस्पताल सञ्चालनका लागि चालु आर्थिक वर्षमा साढे चार करोड रकम विनियोजन गरेको छ भने लम्कीचुहा प्रादेशिक अस्पतालका लागि १४६ जनाको दरबन्दी स्वीकृत गरेको छ । अस्पताल सञ्चालनमा आएसँगै अब आफ्नै क्षेत्रमा गुणस्तरीय स्वास्थ्य सेवा उपलब्ध हुने विश्वास स्थानीयवासीले व्यक्त गरेका छन् । यसले उपचारका लागि टाढा जानुपर्ने बाध्यता अन्त्य हुने अपेक्षा गरिएको छ ।
लम्कीचुहा प्रादेशिक अस्पताल स्थापना तथा सञ्चालनमा महत्वपूर्ण भूमिका खेल्नुभएको भन्दै स्थानीयले मुख्यमन्त्री शाहप्रति आभार तथा धन्यवाद व्यक्त गरेका छन् ।
यसैबीच, मुख्यमन्त्रीले लम्कीचुवा नगरपालिका वडा नं १० चुहामा रहेको लम्केचुहा प्रादेशिक अस्पताल भवनको अनावरण पनि गर्नुभएको छ । रासस
