काठमाडाैँ । निर्वाचन आयोगले दल त्यागका कारण दुई जना वडा अध्यक्षको पद स्वतः रिक्त भएको घोषणा गरेको छ। आयोगले राजनीतिक दलसम्बन्धी ऐन, २०७३ को दफा ३२ को उपदफा (१) तथा राजनीतिक दलसम्बन्धी नियमावली, २०७४ को नियम २२ बमोजिम प्राप्त जानकारीका आधारमा यस्तो निर्णय गरेको हो।
आयोगका अनुसार नेपाली कांग्रेसबाट २०७९ सालको स्थानीय तह निर्वाचनमा निर्वाचित भई पछि अन्य दलमा प्रवेश गरेका जनप्रतिनिधिहरूको सम्बन्धमा दलको केन्द्रीय कार्यसम्पादन समितिको निर्णयसहितको विवरण प्राप्त भएपछि आवश्यक प्रक्रिया पूरा गरिएको थियो। सोही आधारमा आयोगले मिति २०८३/०२/१३ गतेको निर्णयअनुसार सम्बन्धित जनप्रतिनिधिहरू निर्वाचित भएको पद स्वतः रिक्त भएको जनाएको छ।
यस निर्णयअनुसार गुल्मी जिल्लाका दुई स्थानीय तहका जनप्रतिनिधिहरूको पद रिक्त भएको छ। मुसिकोट नगरपालिकाको वडा नं. २ का वडा अध्यक्ष रविन्द्र के.सी. र धुर्कोट गाउँपालिकाको वडा नं. ३ का वडा अध्यक्ष पद्मबहादुर बिष्टको पद रिक्त भएको आयोगले जनाएको छ।
निर्वाचन आयोगले सम्बन्धित स्थानीय तहहरूलाई कानुनअनुसार आवश्यक प्रक्रिया अघि बढाउन समेत निर्देशन दिएको छ।
