काठमाडौं । गोकर्णेश्वर नगरपालिका अन्तर्गत वडा नं २, ३ र ४ मा उच्च रोगजनक एभियन इन्फ्लुएन्जा बर्ड फ्लु पुष्टि भएको छ । संक्रमण देखिएपछि नियन्त्रण तथा रोकथामका लागि नगरपालिकाले तत्काल कडाइका साथ विभिन्न उपाय लागू गरेको छ ।
नगरपालिकाका प्रमुख प्रशासकीय अधिकृत यम नारायण गौलीद्वारा जारी सूचनाअनुसार संक्रमित क्षेत्रहरूमा रहेका हाँस, कुखुरा, बट्टाई, लौकाट, अण्डा, दाना लगायत रोग सर्न सक्ने सबै वस्तु नष्ट गरी सुरक्षित रूपमा डिस्पोज तथा निसंक्रमणको काम भइरहेको छ ।
बर्ड फ्लु मानिसमा समेत सर्न सक्ने जुनोटिक रोग भएकाले यसबाट जोगिन उच्च सतर्कता अपनाउन सबै नागरिक तथा सरोकारवालालाई आग्रह गरिएको छ ।
नगरपालिकाले पन्छी फार्म सञ्चालन तथा व्यवस्थापनमा कडाइ गर्दै निम्न सुरक्षा उपाय अनिवार्य रूपमा पालना गर्न निर्देशन दिएको छ । फार्ममा अनावश्यक व्यक्ति तथा सवारीसाधन प्रवेश रोक्ने, आवश्यक परे निसंक्रमणपछि मात्र प्रवेश गराउने व्यवस्था मिलाइएको छ । एक फार्मका कामदारलाई अर्को फार्ममा जान निषेध गरिएको छ ।
त्यसैगरी प्रयोग भइसकेका अण्डा राख्ने क्रेट पुनः प्रयोग नगर्न, फार्म प्रवेशद्वारमा निसंक्रामक पदार्थसहित फुटबाथ अनिवार्य प्रयोग गर्न र प्रत्येक पटक प्रवेश गर्दा निसंक्रमण प्रक्रिया अपनाउन भनिएको छ ।
खोरभित्र प्रवेश गर्दा छुट्टै बुट र एप्रोन प्रयोग गर्न, खोर भित्र तथा बाहिर नियमित रूपमा निसंक्रमण गर्न र कुकुर, बिरालो तथा मुसा लगायतका जनावर प्रवेश रोक्ने व्यवस्था गर्न समेत निर्देशन दिइएको छ ।
मरेका पन्छीलाई सुरक्षित रूपमा खाडलमा गाड्न, पन्छीजन्य उत्पादन ओसारपसार गर्दा अनिवार्य भेटेरिनरी प्रमाणपत्र लिन तथा मासु राम्रोसँग पकाएर मात्र सेवन गर्न आग्रह गरिएको छ ।
अकस्मात धेरै पन्छी बिरामी परे वा मरेमा तत्काल स्थानीय तह वा पशु सेवा कार्यालयमा जानकारी दिन समेत अनुरोध गरिएको छ ।
नगरपालिकाले “सतर्क बनौं, बर्ड फ्लुबाट आफू, आफ्नो व्यवसाय र समुदायलाई जोगाऔं” भन्ने सन्देशसहित सबैलाई सहयोग गर्न आह्वान गरेको छ ।
