काठमाडौं । कुन्दन अर्याल शुरुदेखि नै प्रधानमन्त्री केपी शर्मा ओलीले नरुचाएका मानिस हुन् । तर उनलाई यो पदमा नियुक्तिका लागि मानवअधिकारवादीहरु सुशिल, सुवोध प्याकुरेलको बढी जोड थियो । किनभने उनी प्याकुरेलहरुका भान्जा हुन् । प्रधानमन्त्रीले यसअघि पनि नेपाल टेलिभिजनको अध्यक्ष र अरु पनि सरकारी सञ्चारमाध्यमहरुमा नियुक्ति खाइसकेको कारण प्रधानमन्त्रीले पनि अनिच्छा देखाएका थिए । तर अन्तिममा मन नलागी नलागी आफ्नो सञ्चार सल्लाहकारमा नियुक्ति दिन बाध्य भएका थिए ।
प्रधानमन्त्री ओलीले नरुचाएका अर्का व्यक्ति हुन् राजन भट्टराई । यसै कारणले पनि भट्टराईलाई प्रधानमन्त्री आफू प्रधानमन्त्री भएको करिब वर्षदिनपछि मात्र नियुक्त गरेका हुन् । अनि नियुक्त भएको लामो समयसम्म पनि उनलाई प्रधानमन्त्री कार्यालयमै बस्ने कोठा उपलब्ध थिएन । यता यस्तो अवस्था रहँदा अर्याललाई प्रधानमन्त्रीले प्रधानमन्त्री कार्यालयमा नै राख्न मानेनन् । अहिले उनी अर्कै भवनमा छन् । बरु अरु कार्यकर्ताहरुले दिनहूँ प्रधानमन्त्रीलाई भेट्न पाउँछन् तर अर्यालले पाउँदैनथे । उनीसँग सञ्चारका विषयमा प्रधानमन्त्रीले सल्लाह लिने या दिने काम प्राय हुदैनथ्यो । प्रधानमन्त्री उनलाई मन पराउँदैनथे ।
प्रधानमन्त्री हालैमात्र उपचारका लागि ग्रान्डी अस्पताल भर्ना हुँदा त्यसको समाचार अर्यालले हतार गरी दिएका थिए । उनले प्रधानमन्त्री उपचारका लागि ग्रान्डी अस्पताल भर्ना भएका भनेर ट्वीट गरेका थिए । उनको सो ट्वीटबाट नै देशभरिका अनलाइन मिडियाले समाचार बनाएका थिए । तर पनि बालुवाटार त्यो समाचार सार्वजनिक गर्न चाहँदैनथ्यो । मिर्गाैला डायलासिस गरेर फर्केपछि प्रधानमन्त्री नियमित स्वास्थ्य जाँच गरी फिर्ता भएको भनी विज्ञप्तिमार्फत जानकारी गराउने पक्षमा प्रमुख सल्लाहकार विष्णु रिमाल थिए । तर देशका अनलाइन खबरहरुमा अर्याल छाएपछि रिमालले पनि फोन गरेर उनलाई हप्काएका थिए । पहिलो दिन डायलासिस गराएपछि आराम गरेर उठेका प्रधानमन्त्री ओलीले पनि अर्यालको समाचार देखेर चकित परेका थिए ।
यसअघि पनि सिंगापुरमा उपचाररत प्रधानमन्त्रीको समाचार यहाँ डा.अर्यालले विचारै नगरी सार्वजनिक गर्दा पनि प्रधानमन्त्री रिसाएका थिए । अर्यालले देशका सञ्चारमाध्यमहरुसँग राम्रो सम्बन्ध बनाइदिन नसकेको गुनासो प्रधानमन्त्रीको थियो । त्यसका लागि उनले खासै प्रयास पनि गर्दैनथे । उनी कार्यालयमा बसेर आफ्नो व्यक्तिगत काम गर्ने, आरआरका विद्यार्थीहरुलाई बोलाएर चिया खाएर गफ्फिने गरेको गुनासो सचिवालयका एक सदस्यले विष्णु रिमाललाई सुनाइरहने गर्दथे । डा. अर्यालले सरकार या प्रधानमन्त्रीको राम्रोका लागि भन्दा पनि आफू प्रचारमा आउने गरी मिडियामा आउने गरेका गुनासाहरु सचिवालयका सदस्यहरु नै गर्ने गर्दथे ।
त्यसैगरी प्रधानमन्त्रीले मन नपराएका अर्का पात्र हुन् विदेश मामिलासम्बन्धी सल्लाहकार राजन भट्टराई । उनले दिनुपर्ने समाचारको प्रचार गर्न नसक्ने तर नदिनुपर्ने खबर मिडियालाई दिएर अप्ठेरोमा पार्ने गरेका थिए । चिनियाँ राष्ट्रपति सि जिनपिङ नेपाल आउने कुरा परराष्ट्र मन्त्रालयले सार्वजनिक गर्नु अगावै उनले रिपोर्टस् क्लबमा पुगेर सार्वजनिक गरेका थिए । उनले यसो गरेपछि परराष्ट्र सचिव संकरदाश बैरागीले प्रधानमन्त्रीसँग गुनासो गरेका थिए । भट्ट।ाई आफूले भारतबाट पिएचडी गरेको र आफूलाई सबै थाहा भएको भन्दै कूटनीतिक विषयका संवेदनशिल सूचनाहरु पनि नलुकाई आफूलाई दिन परराष्ट्र मन्त्रालयका अधिकारीहरुलाई दबाब दिने गर्दछन् । यो कुरा परराष्ट्र मन्त्रालयका कसैलाई पनि मन परेको छैन । प्रधानमन्त्री स्वयं पनि भट्टराईले गोप्य सूचना बाहिर लाने गरेको भनी उनको संका गर्ने गर्दथे । त्यसैले पनि सिको नेपाल भ्रमणका समयमा सबै स्थानमा उनलाई पहूँच दिइएको थिएन । यसरी यी दुई जना व्यक्तिबाट रिसाएका प्रधानमन्त्रीलाई उनीहरुलाई मात्र निकाल्दा राम्रो नहुने भएपछि सचिवालयका सबै सदस्यलाई राजिनामा दिन भनेका हुन् ।
धेरैले विष्णु रिमालप्रति पार्टी र बाहिरबाट पनि आलोचना भएपछि प्रधानमन्त्रीले उनलाई निकाल्न सबैको राजीनामा मागेको अड्कल गरेपनि वास्तविकता भने त्यस्तो होइन । उनलाई प्रधानमन्त्रीले अब खाली हुन लागेको राष्ट्रिय सभाको सदस्यमा लाने तयारी गरेको भित्री तयारी गरेका छन् । त्यसपछि उनलाई मन्त्री बनाउने तयारी उनको छ । रिमालको ठाउँमा भने परराष्ट्र मन्त्री प्रदीप ज्ञवालीलाई लाने उनको तयारी छ । समाचार स्रोत भन्छ डा.अर्याल र भट्टराई बाहेकका अरु सबै सचिवालय सदस्यहरुलाई प्रधानमन्त्रीले पुन: नियुक्ति गर्नेछन् । उनीहरुले आफ्नो पिएचडीको घमण्ड देखाएर प्रधानमन्त्रीको सचिवालयका सबै सदस्य र ती कार्यालयका कर्मचारीहरुलाई नै अनावश्यक बखेडा झिक्ने गरेका उनीहरुको भनाई छ ।
