काठमाडौँ। नेकपा (एमाले) को सचिवालय बैठकमा पार्टीको समग्र साङ्गठनिक अवस्था र गत निर्वाचनको समीक्षा शुरु भएको छ ।
शुक्रवार भक्तपुरको गुण्डुस्थित पार्टी अध्यक्ष केपी शर्मा ओलीको निवासमा बसेको बैठकमा नेताहरूले पार्टीको आगामी कार्यदिशा र साङ्गठनिक सुदृढीकरणका विषयमा धारणा राख्नुभएको हो ।
बैठकपछि सञ्चारकर्मीहरूलाई प्रतिक्रिया दिँदै पार्टीका उपमहासचिव लेखराज भट्टले शुक्रवारको बैठकमा पाँच जना उपाध्यक्षहरूले आफ्नो विचार प्रश्तुत गरेको जानकारी दिनुभयो ।
उहाँकाअनुसार बैठक मुख्यतया पार्टीको समग्र अवस्था र निर्वाचनको समीक्षामा केन्द्रित रहेको छ । निर्वाचनको समीक्षालाई दुईवटा पाटोबाट विश्लेषण गरेर अगाडि बढ्ने पार्टीको तयारी छ ।
उपमहासचिव भट्टले कार्यविभाजनको विषयमा आजको बैठकमा प्रवेश नभएको स्पष्ट पार्नुभयो । बैठकमा अध्यक्ष ओलीले छलफलका क्रममा आएका विषयहरूमा सहजीकरण गर्नुभएको थियो । नेताहरूले निकै खुलेर र गम्भीरतापूर्वक आफ्ना विचारहरू प्रश्तुत गरिरहेको भट्टले बताउनु भयो ।
उहाँले भन्नुभयो, ‘कार्यविभाजनको प्रश्तावमाथि आउने सुझावका आधारमा आवश्यक परे परिमार्जन वा संशोधन गरेर जान सकिनेछ । यो विषय एजेन्डाका रूपमा आएपछि हामी आफ्ना कुराहरू राख्नेछौँ ।’
सचिवालयका बाँकी १२ जना सदस्यहरूले भोलिको बैठकमा आफ्नो धारणा राख्ने कार्यक्रम रहेको छ । अर्को बैठक शनिवार बिहान साढे ११ बजे पुनः अध्यक्ष ओलीकै निवासमा बस्ने गरी स्थगित भएको छ । –न्युज एजेन्सी नेपाल
