काठमाडाैँ । प्रतिनिधिसभामा प्रधानमन्त्रीको अनुपस्थितिलाई लिएर विपक्षी दलहरूले तीव्र विरोध जनाइरहेका बेला सभामुख डोलप्रसाद अर्यालले बैठक सञ्चालनलाई रोकेनन् । पहिलो बैठक स्थगित गरे पनि दोस्रो बैठकमा भने विपक्षीको अवरोधकै बीच संसद्को कार्यसूची अगाडि बढाइएको हो ।
बिहीबारको बैठकमा प्रधानमन्त्री तथा गृहमन्त्री एवं विज्ञान, प्रविधि तथा नवप्रवर्तनमन्त्री वालेन्द्र शाहले ‘प्रतिनिधि सभा सदस्य निर्वाचन (पहिलो संशोधन) विधेयक–२०८३’ माथि विचार गरियोस् भन्ने प्रस्ताव प्रस्तुत गर्ने कार्यसूची तय गरिएको थियो । तर, प्रधानमन्त्री बैठकमा उपस्थित नभएपछि सभामुख अर्यालले प्रधानमन्त्रीको तर्फबाट कानुन, न्याय तथा संसदीय मामिलामन्त्री सोबिता गौतमलाई प्रस्ताव पेस गर्न अनुमति दिएका थिए ।
यस निर्णयसँगै विपक्षी दलहरूले कडा आपत्ति जनाए । उनीहरूले नीति तथा कार्यक्रममाथिको छलफलदेखि नै प्रधानमन्त्रीको उपस्थितिको माग भइरहेको स्मरण गराउँदै संसद् निरन्तर प्रधानमन्त्रीविहीन बनाइएको आरोप लगाए ।
तर, सभामुखले विपक्षीको आपत्तिपछि पनि कार्यसूची रोकेनन् । बरु सत्तापक्षलाई प्रतिवाद गर्ने समय उपलब्ध गराइयो । रास्वपाका सांसद अशोककुमार चौधरीले प्रधानमन्त्रीलाई आफ्नो तर्फबाट अर्को मन्त्रीलाई जिम्मेवारी दिने अधिकार रहेको दाबी गरेपछि संसद्मा सत्तापक्ष र प्रतिपक्षबीच चर्काचर्की भएको थियो ।
विवाद बढेपछि सभामुखले केही समयका लागि बैठक स्थगित गरेका थिए । तर, दोस्रो बैठक सुरु भएपछि पनि विपक्षीको नाराबाजी कायम रहँदा सभामुख अर्यालले संसद् सञ्चालनलाई निरन्तरता दिएका हुन् ।
