धनुषा। मधेस प्रदेशसभाका सभामुख रामअशिष यादवले न्यायिक क्षेत्रलाई थप प्रभावकारी, पारदर्शी र जनउत्तरदायी बनाउन कानुन व्यवसायी र न्यायलयबीच नियमित संवाद आवश्यक रहेको बताउनुभएको छ ।
मुख्य न्यायाधिवक्ताको कार्यालय मधेस प्रदेशद्वारा आज जनकपुरधाममा आयोजित ‘बारसँग छलफल तथा अन्तरक्रिया कार्यक्रम’मा सभामुख यादवले न्यायसम्पादनको कार्यलाई जनमुखी बनाउन यस्ता कार्यक्रमले महत्वपूर्ण भूमिका खेल्ने विचार व्यक्त गर्नुभयो ।
उहाँले कानुन व्यवसायी, न्यायाधीश तथा सरकारी वकिलबीचको समन्वयले न्यायिक प्रणालीलाई थप सुदृढ बनाउने उल्लेख गर्दै संविधानले प्रत्याभूत गरेको नागरिक अधिकारको संरक्षणमा सबैपक्ष जिम्मेवार हुनुपर्ने बताउनुभयो ।
सभामुख यादवले मधेस प्रदेशमा न्यायिक पहुँच विस्तार, छिटोछरितो न्याय सम्पादन तथा पीडितमैत्री कानुनी सेवा प्रवाह आजको आवश्यकता रहेको उल्लेख गर्नुभयो ।
उहाँले न्याय क्षेत्रप्रति नागरिकको विश्वास अभिवृद्धि गर्न पारदर्शिता, निष्पक्षता र उत्तरदायित्व अपरिहार्य रहेको धारणा राख्नुभयो ।
नेपाल बार एसोसिएसन जनकपुरधामको सभाहलमा आयोजित कार्यक्रममा कानुन व्यवसायी, न्यायिक क्षेत्रका व्यक्तित्व तथा विभिन्न निकायका प्रतिनिधिको सहभागिता थियो ।
कार्यक्रममा न्यायिक अभ्यासमा देखिएका समस्या, कानुनी जटिलता तथा सुधारका उपायबारे छलफल गरिएको थियो ।
कार्यक्रम मुख्य न्यायाधिवक्ताको कार्यालय, जनकपुरधाम मधेस प्रदेशको आयोजनामा तथा नेपाल बार एसोसिएसन जनकपुरधामको सहआयोजनामा भएको हो । रासस
