भैरहवा। भैरहवामा आगामी जेठ ९ र १० गते ‘सिद्धार्थ फुड एन्ड फन’ खाना महोत्सव हुने भएको छ ।
सिद्धार्थ हस्पिटालिटी ग्रुपको आयोजना यहाँ रहेको होटल सिद्धार्थ भिलासामा सञ्चालन हुने महोत्सवमा नेपाली रैथाने परिकारदेखि अन्तरराष्ट्रिय खानासम्मका स्वाद प्रस्तुत गरिने आयोजकले जनाएको छ ।
सिद्धार्थ बिजनेस ग्रुप अफ हस्पिटलिटीका प्रमुख कार्यकारी अधिकृत कृष्ण न्यौपानेका अनुसार महोत्सवमा नेवारी, हिमाली, थारू, मध्यपश्चिम तथा पूर्वी भेगका परम्परागत खानाका साथै ‘कन्टिनेन्टल’, भारतीय, चिनियाँ, अरेबिक तथा ‘मेडिटेरियन’ परिकारका स्टल रहनेछन् ।
महोत्सवमार्फत नेपाली रैथाने खानाको प्रवर्द्धन गर्दै विभिन्न समुदाय र भेगका मौलिक स्वादलाई एकैथलोमा प्रस्तुत गर्ने उद्देश्यले आयोजना हुने महोत्सवमा ‘ग्रुप’अन्तर्गत देशका विभिन्न सहरमा सञ्चालित ‘आउटलेट’मा कार्यरत ‘सेफ’हरूले आ–आफ्नो क्षेत्रका विशेष परिकार तयार गर्नेछन् ।
कार्यक्रममा खाना खाने प्रतियोगिता, घरेलु खाना पकाउने प्रतियोगिता, बालबालिकामुखी खेल तथा अन्य मनोरञ्जनात्मक गतिविधि सञ्चालन गरिने आयोजकले जनाएको छ । खाना पकाउने प्रतियोगितामा सहभागी हुन इच्छुक व्यक्तिले सिद्धार्थ ‘हस्पिटालिटी ग्रुप’ मा सम्पर्क गरी नाम दर्ता गर्न सक्ने व्यवस्था गरिएको छ ।
महोत्सवको पहिलो दिन विभिन्न कलाकारले साङ्गीतिक प्रस्तुति दिने छन् । दुवै दिन लुम्बिनी क्षेत्रका स्थानीय कलाकारहरूले पनि लोक तथा सांस्कृतिक कार्यक्रम प्रस्तुत गर्ने जनाइएको छ ।
कार्यक्रम दैनिक दिउँसो ३ः०० देखि राति १०ः०० बजेसम्म सञ्चालन हुनेछ । त्यस अवधिमा आगन्तुकले आफूले चाहेका परिकारको स्वाद लिन सक्ने सिद्धार्थ बिजनेस ग्रुप अफ हस्पिटलिटीका क्षेत्रीय कार्यकारी निर्देशक महेन्द्र न्यौपानेले जानकारी दिनुभयो ।
ग्रुपले हाल देशभर आफ्नै तथा व्यवस्थापन ‘मोडेल’मार्फत ३० वटा आउटलेट सञ्चालन गर्दै आएको छ भने करिब दुई हजार ५०० जनालाई रोजगारी प्रदान गरिरहेको जनाइएको छ । रासस
