काठमाडौं । पूर्वसचिव शारदाप्रसाद त्रितालले संवैधानिक निकायमा ३ जना मात्र पदाधिकारी नियुक्त गर्दा उचित हुने सुझाब दिनुभएको छ ।
सामाजिक संञ्जालमा एक स्टाटस राख्दै पूर्वसचिव त्रितालले संवैधानिक निकायको संख्या नै चाहिने भन्दा बढी रहेको सन्दर्भमा पदाधिकारीको पुरै संख्यामा नियुक्ति हुन आवश्यक नरहेको जनाउनु भएको हो ।
उहाँले दिनु भएको सुझाब यस्तो छ-
संवैधानिक परिषद् सम्बन्धी अध्यादेश जारी भएपछि अव प्रधान न्यायाधीश लगायत संवैधानिक निकायका पदाधिकारी नियुक्तिको बाटो खुल्यो । संवैधानिक निकायमा महालेखा परीक्षक बाहेक अरु निकायमा ५ जना सदस्य रहने व्यवस्था छ ।
व्यावहारिक र मितव्ययिताको दृष्टिले हेर्ने हो भने प्रत्येक संवैधानिक निकायमा ३ जना पदाधिकारी भए पुग्छ, ५ जना चाहिंदैन । संवैधानिक निकायको संख्या नै चाहिने भन्दा बढी रहेको सन्दर्भमा पदाधिकारीको पुरै संख्यामा नियुक्ति हुन आवश्यक छैन ।
प्रमुख नै रिक्त रहेको अवस्थामा नियुक्ति गर्ने नत्र ३ जना भन्दा बढी हुने गरी नियुक्ति नगर्ने नीति लिए हुने हो सरकारले ।
