अस्टिन: नेपाली नयाँ वर्ष २०८३ को अवसरमा ग्रेटर अस्टिन नेप्लिज चेम्बर अफ कमर्सले आइतबार पिकनिक कार्यक्रम सम्पन्न गरेको छ। ग्रेटर अस्टिनको हटो काउन्टीमा रहेको आदम अर्गेइन पार्कमा उक्त पिकनिक कार्यक्रम आयोजना गरिएको थियो।
ग्रेटर अस्टिन नेपाली समाजमा लामो समयसम्म नेतृत्व तथा आर्थिक पारदर्शितासम्बन्धी विवादका कारण नेपाली समुदाय विभाजित भएको अवस्थामा नेप्लिज चेम्बर अफ कमर्सले नेपालीहरूबीच एकता र परम्परागत भाइचाराको सम्बन्ध जोगाउन महत्वपूर्ण भूमिका खेलेको छ।
अप्रिल १२ गतेका लागि तय गरिएको पिकनिक कार्यक्रम मौसमले साथ नदिएपछि आज (मे ३ गते) का लागि सारिएको थियो। उक्त कार्यक्रमले नयाँ वर्षको अवसरमा नेपालीहरू भेला भई रमाइलो गर्दै नयाँ वर्षको खुसी साट्ने परम्परालाई जीवन्त राख्न सहयोग गरेको छ।
कार्यक्रममा नाचगान तथा बालबालिकाहरूका लागि दौड प्रतियोगिता आयोजना गरिएको थियो। पिकनिकका साथै आयोजक संस्थाले छोटो औपचारिक कार्यक्रम पनि राखेको थियो।
कार्यक्रममा स्वागत मन्तव्य राख्दै चेम्बरका कार्यसमिति सदस्य तथा एनआरएनए एनसीसीका उपसभापति प्रदीप चौलागाईंले उपस्थित सबैलाई स्वागत गर्नुभयो।
कार्यक्रममा मन्तव्य राख्दै चेम्बरका वरिष्ठ सल्लाहकार तथा ग्रेटर अस्टिन नेपाली समाजको आसन्न निर्वाचनमा सभापति पदका प्रत्याशी पदम ठकुराठीले आफ्नो टिमका उम्मेदवारहरूको परिचय गराउँदै संस्थामा परिवर्तनका लागि आफ्नो समूहलाई विजयी बनाउन सबैसँग अपिल गर्नुभयो।
पदम ठकुराठीको नेतृत्वमा रहेको उक्त टिममा वरिष्ठ उपसभापतिमा विनोद शाह, महिला उपसभापतिमा ज्ञानु कोईराला, उपसभापतिमा बोधराज घिमिरे, महासचिवमा विष्णु पहाडी, सचिवमा प्रिन्स भट्ट, कोषाध्यक्षमा यात्री ओली, कार्यकारी बोर्ड सदस्यमा दीपक हुमागाईं र उर्मिला गौतम चौलागाईं, ट्रस्टी बोर्ड सदस्यमा एलिजा थापा पौडेल, राजेश्वर निरौला, देवी भेटुवाल, शर्मिला थापा खनाल, वर्षा गौतम र ईश्वर वास्तोला रहेका छन्।
कार्यक्रममा मन्तव्य राख्दै ग्रेटर अस्टिन नेप्लिज चेम्बर अफ कमर्सका सभापति सिपी पौडेलले अस्टिनमा विभाजित हुँदै गएको नेपाली समाजलाई जोड्न र सामूहिक नेतृत्वको विकास गर्न चेम्बरले सबैलाई समेट्ने प्रयास गरिरहेको जानकारी दिनुभयो। कार्यक्रमको सञ्चालन संस्थाका महासचिव उद्धव खनालले गर्नुभएको थियो।
