काठमाडौं । नेकपा (एमाले) का उपाध्यक्ष विष्णुप्रसाद पौडेलले माओवादी केन्द्रका अध्यक्ष पुष्पकमल दाहाल ‘प्रचण्ड’ को ‘सत्ता कब्जा’ गर्ने सोच र उग्रवामपन्थी भड्कावका कारण माओवादी आन्दोलन वर्तमान अवस्थामा विघटनतर्फ उन्मुख भएको दाबी गरेका छन् ।
विगतका राजनीतिक घटनाक्रम स्मरण गर्दै उपाध्यक्ष पौडेलले २०६६ सालमा तत्कालीन प्रधानसेनापति रुकमाङ्गत कटवाललाई हटाउने सरकारको निर्णयप्रति एमालेले कडा असहमति जनाएको उल्लेख गरे । उनका अनुसार सो निर्णयका क्रममा एमालेले सरकारबाट बाहिरिने चेतावनी दिए पनि प्रचण्डले आफ्नो अडान नछाड्दा अन्ततः सरकारको नेतृत्व नै गुमाउनुपरेको थियो ।
उपाध्यक्ष पौडेलले माओवादी शान्तिपूर्ण राजनीतिमा आए पनि लोकतान्त्रिक अभ्यासलाई पूर्ण रूपमा आत्मसात गर्न नसकेको र सत्ता कब्जाको मानसिकता नत्यागेकै कारण आज उक्त पार्टी संकटमा पुगेको तर्क गरे।
उनले शान्तिपूर्ण आन्दोलनकै माध्यमबाट राजतन्त्र अन्त्य भई गणतन्त्र स्थापना भएको उल्लेख गर्दै हिंसात्मक बाटोले कुनै उपलब्धि नदिने टिप्पणी गरे
उनले भने, “त्यतिबेला प्रचण्डजीले सेना प्रमुख हटाएर आफूअनुकूल व्यक्तिलाई नियुक्त गरी सत्ता कब्जा गर्ने रणनीति बनाउनु भएको थियो। हामीले यो बाटो आत्मघाती हुन्छ भनेर पटक–पटक सम्झायौँ, तर उहाँले मान्नुभएन। उहाँले कडा रूपमा भन्नुभएको थियो– म अगाडि बढिसकेँ, अब अल्झाउने काम नगर्नुस्।”
उपाध्यक्ष पौडेलले थप भने, “आज आइपुग्दा नेपालमा माओवादी नामको संगठनको अस्तित्व करिब समाप्त भएको छ। प्रचण्ड नेतृत्वको माओवादी अब माओवादी रहेन। उसले माओवाद र जनयुद्धको मार्ग त्यागिसकेको छ।”
उनले माओवादी उग्रवामपन्थी धारबाट अलग भए पनि नयाँ राजनीतिक धारमा स्पष्ट रूपमा अघि बढ्न नसकेको टिप्पणी गर्दै अहिलेको नेतृत्वसँग कम्युनिस्ट आन्दोलनको नेतृत्व गर्ने क्षमता नरहेको जिकिर गरे।
