काठमाडौँ । सरकारले संविधान संशोधनको औपचारिक गृहकार्यलाई तीव्र बनाएको छ। ‘संविधान संशोधन बहसपत्र तयार गर्ने कार्यदल–२०८२’ मार्फत सरकारले संशोधन प्रक्रिया अघि बढाएको हो।
प्रधानमन्त्री वालेन्द्र शाहका प्रमुख राजनीतिक सल्लाहकार असिम शाहको संयोजकत्वमा गठित कार्यदलले आज दिउँसो ३ देखि ५ बजेसम्म प्रधानमन्त्री तथा मन्त्रिपरिषद्को कार्यालयमा वरिष्ठ अधिवक्ता तथा कानुन व्यवसायीहरूसँग विशेष छलफल गरेको छ। छलफलमा संविधान संशोधनका आवश्यक पक्ष, सुधारका क्षेत्र तथा सम्भावित संरचनागत परिवर्तनबारे विचार–विमर्श गरिएको जनाइएको छ।
यसअघि कार्यदलले हिजो संविधानविद्हरूसँग पनि परामर्श गरेको थियो। विभिन्न क्षेत्रका विज्ञहरूसँग निरन्तर छलफल गर्दै कार्यदलले संशोधनका आधार तयार पार्ने कामलाई तीव्रता दिएको देखिएको छ।
मन्त्रिपरिषद्को २०८२ चैत १६ गतेको निर्णयअनुसार गठन गरिएको उक्त कार्यदलले वैशाख १० गते बसेको बैठकको निर्णयअनुसार परामर्श प्रक्रियालाई अघि बढाएको हो।
कार्यदलले सबै सरोकारवालासँगको छलफलबाट प्राप्त सुझावहरूको संकलन गरी संविधान संशोधनसम्बन्धी ठोस बहसपत्र तयार पार्ने र सरकारसमक्ष पेश गर्ने तयारी गरेको छ।
