बैतडी। बैतडीको पुर्चौंडी नगरपालिकाले खेलाडीलाई नगदसहित सम्मान गरेको छ ।
१६औँ जिल्लास्तरीय राष्ट्रपति रनिङ शिल्ड प्रतियोगितामा सहभागी ६८ जना खेलाडीलाई नगरपालिकाले नगदसहित सम्मान गरेको हो ।
खेलाडीको मनोबल बढाउन नगरपालिकाले प्रोत्साहन स्वरुप नगदसहित सम्मान गरेको नगरप्रमुख दीपकबहादुर बमले जानकारी दिनुभयो । प्रतियोगितामा स्वर्ण पदक प्राप्त गर्ने खेलाडीलाई जनही रु दुई हजार ५००, रजत पदक प्राप्त गर्ने २१ जनालाई रु दुई हजार र काश्य पदक प्राप्त गर्ने खेलाडीलाई रु एक हजार ५०० प्रदान गरिएको उहाँले जानकारी दिनुभयो ।
दशरथचन्द नगरपालिका–२ देहीमाण्डौँस्थित निङ्गलाशैनी खेलमैदानमा भएको १६औँ जिल्लास्तरीय राष्ट्रपति रनिङ शिल्ड प्रतियोगितामा १२ स्वर्ण, नौ रजत र सात काश्य गरी २८ पदकसहित पुर्चौंडीले लगातार दोसोपटक उपाधि जितेको छ । रासस
