काठमाडौँ। पर्यटनको राजधानि पोखरामा नेपाली नयाँ वर्षको अवसरमा निःशुल्क सटल बस सेवा शुरु भएको छ ।
नेपाली नयाँ वर्ष २०८३ को अवसर पारेर पोखरा अन्तर्राष्ट्रिय विमानस्थलबाट अम्मरसिंह चोकसम्म निःशुल्क इलेक्ट्रिक सटल बस सेवा शुरु गरिएको हो ।
उक्त सेवाको पोखरा महानगरका प्रमुख धनराज आचार्यले मंगलवार औपचारिक रूपमा शुरु गर्नुभयो । पोखरा महानगरपालिकाको पहलमा महानगर यातायात प्रालि, कृषि बिकास बैक, कामना सेवा विकास बैकको सहकार्यमा सेवा शुरु गरिएको हो ।
पाइलट परियोजनाका रूपमा असार मसान्तसम्म यो सेवा निःशुल्क प्रयोग गर्न पाइने छ । त्यसपछि भने न्यूनतम शुल्कमा नियमित रूपमा सञ्चालन गर्ने योजना बनाइएको छ ।
पोखराका मेयर धनराज आचार्यका अनुसार पोखरामा विमानस्थलदेखि लेकसाइड वा शहरका विभिन्न ठाउँमा जाँदा महँगो ट्याक्सी भाडाको गुनासो बढेपछि यसको विकल्पका रूपमा यो सेवा शुरु गरिएको छ ।
विमानस्थलबाट मुख्य चोक क्षेत्रमा यात्रुलाई ल्याए पछि विभिन्न विकल्पमा आफ्नो गन्तव्यमा पुग्न सकुन भन्ने उद्देश्यले पहिलो चरणमा २ वटा बसबाट उक्त सेवा सञ्चालन हुने भएको आचार्यले बताउनु भयो ।
३२ सिटे इलेक्ट्रिक बस हुनेछ, जसमा आरामदायी यात्रा अनुभवका साथै लगेज राख्ने सुविधा पनि पाइनेछ। बिहान ६ बजेदेखि राति १० बजेसम्म दैनिक दुई वटा बसले निरन्तर सेवा दिने व्यवस्था मिलाइएको छ ।
पोखरा विमानस्थलमा दैनिक ५ हजार यात्रु ओहोरदोहोर गर्ने गर्छन् । –न्युज एजेन्सी नेपाल
