काठमाडौँ। रुसको उल्यानोव्स्क क्षेत्रमा शुक्रवार एउटा यात्रुवाहक रेलका सातवटा डिब्बा लिकबाट बाहिरिँदा (डिरेल हुँदा) घाइते हुनेको संख्या २४ पुगेको छ ।
रसियन रेल्वेका अनुसार मस्कोबाट चेल्याबिन्स्क सहरतर्फ गइरहेको उक्त रेल मस्को समयअनुसार बिहान ६ः२६ बजे ब्रायन्डिनो स्टेशन नजिकै दुर्घटनामा परेको हो ।
प्राप्त जानकारीअनुसार उक्त रेलमा जम्मा आठवटा डिब्बा थिए र त्यसमा ४ सय भन्दा बढी यात्रुहरू सवार थिए । रेल के कारणले लिकबाट बाहिरियो भन्नेबारे तत्काल खुल्न सकेको छैन ।
चेल्याबिन्स्क क्षेत्रका गभर्नर एलेक्सी टेक्सलरले दुर्घटनामा कसैको पनि मृत्यु नभएको जानकारी दिनुभयो । स्थानीय अधिकारीहरूका अनुसार दुर्घटनाग्रस्त रेलबाट यात्रुहरूको उद्धार कार्य जारी छ र उनीहरूलाई उल्यानोव्स्क स्टेशनतर्फ पठाइँदैछ । सिन्ह्वा/न्युज एजेन्सी नेपाल
