काठमाडौँ । नेपाली कांग्रेसले संवत् २०८२ भाद्र २३ र २४ गते ‘जेन–जी आन्दोलन’का क्रममा भएको घटनासम्बन्धी जाँचबुझ आयोगले नेपाल सरकारसमक्ष पेश गरेको प्रतिवेदन अध्ययन गरी राय–सुझावसहितको प्रतिवेदन तयार गर्न अध्ययन समिति गठन गरेको छ । वरिष्ठ अधिवक्ता यदुनाथ खनालको संयोजकत्वमा गठित उक्त समितिलाई सात दिनभित्र केन्द्रीय कार्यालयमा प्रतिवेदन पेश गर्ने जिम्मेवारी दिइएको छ ।
समितिमा पूर्व न्यायाधीश कृष्णप्रसाद पौडेल, अधिवक्ता विनोद कार्की, अधिवक्ता रामचन्द्र गौतम (आर.सी.) र युवा अभियन्ता यजश्वी राई सदस्यका रूपमा रहेका छन् ।
पार्टीका कार्यवाहक मुख्य सचिव कृष्णप्रसाद दुलालले जारी गरेको जानकारीअनुसार जाँचबुझ आयोगका अध्यक्ष गौरीबहादुर कार्की नेतृत्वको आयोगले सरकारसमक्ष बुझाएको प्रतिवेदनको विस्तृत अध्ययन गरी आवश्यक राय, सल्लाह र सुझावसहितको प्रतिवेदन तयार गर्न समिति गठन गरिएको हो ।
समितिले तोकिएको समयभित्र आन्तरिक अध्ययन पूरा गरी पार्टीलाई औपचारिक प्रतिवेदन बुझाउनेछ ।
