काठमाडाैँ । स्वतन्त्र सांसद महावीर पुन ले प्रतिनिधिसभामा आफ्नो भूमिका सत्तापक्ष र प्रतिपक्षभन्दा माथि उठेर निष्पक्ष रहने बताउनुभएको छ।
बिहीबार प्रतिनिधिसभाको पहिलो बैठकलाई सम्बोधन गर्दै पुनले आफू परम्परागत राजनीतिज्ञ नभई समाजसेवीका रूपमा संसदमा आएको उल्लेख गर्नुभयो। “म एउटा फरक प्रकारको सांसदको रूपमा यहाँ आएको छु,” उहाँले भन्नुभयो, “बोल्ने शैली, काम गर्ने तरिका र सोचाइ सबैमा म अरुभन्दा फरक छु।”
उहाँले आफू कहिल्यै सांसद बन्ने कल्पना नगरेको तर परिस्थितिले यहाँसम्म ल्याएको बताउनुभयो। अमेरिका अध्ययनपछि २०४९ सालदेखि नेपालमै रहेर झोला बोकेर पूर्णकालीन समाजसेवामा संलग्न रहँदै आएको स्मरण गर्दै उहाँले आफू राजनीतिभन्दा समाजसेवामा केन्द्रित व्यक्ति भएको स्पष्ट पार्नुभयो।
पुनले भदौ २३ र २४ गतेको ‘जेन–जी आन्दोलन’पछि अप्रत्याशित रूपमा शिक्षामन्त्री बन्ने अवसर पाएको अनुभव पनि साझा गर्नुभयो। “किताब बेचिरहेको मान्छे मन्त्री बनेँ,” उहाँले भन्नुभयो, “त्यसपछि शिक्षा क्षेत्रमा गहिरिएका समस्या, चरम राजनीतिकरण र विकृति नजिकबाट देख्ने मौका पाएँ।”
शिक्षामन्त्रीको जिम्मेवारी सम्हालेपछि शिक्षा क्षेत्र सुधारका लागि आफूले तीनवटा विधेयकको मस्यौदा र चारवटा नियमावली तयार पारेको जानकारी दिँदै उहाँले विद्यालय, कलेज र विश्वविद्यालयमा शैक्षिक वातावरण सुधार गर्ने उद्देश्य रहेको बताउनुभयो। ती प्रस्तावहरू तत्कालीन सरकारले अध्यादेशमार्फत ल्याउन नसक्दा रोकिएको र आफूले प्रधानमन्त्री कार्यालयमा बुझाएको पनि उहाँले उल्लेख गर्नुभयो।
उहाँले सरकारलाई शिक्षा सुधारका लागि आफूले तयार पारेका विधेयक र नियमावली अघि बढाउन सुझाव दिँदै संसदमा आफ्नो भूमिका निष्पक्ष र सुधारमुखी रहने दोहोर्याउनुभयो।
