काठमाडौं : नेपाल प्रहरीको काठमाडौं उपत्यका अपराध अनुसन्धान कार्यालयले वैदेशिक रोजगारीका नाममा ठगी गर्ने तीन जनालाई पक्राउ गरेको छ।
उनीहरूलाई काठमाडौं उपत्यकाका विभिन्न स्थानबाट पक्राउ गरी थप अनुसन्धान तथा आवश्यक कारबाहीका लागि वैदेशिक रोजगार विभाग ताहाचल पठाइएको प्रहरीले जनाएको छ।
प्रहरीका अनुसार बेरोजगार युवायुवतीलाई आकर्षक तलबको प्रलोभन देखाई क्रोएसया र अमेरिका पठाइदिने भन्दै लामो समयसम्म झुक्याई रकम असुल्ने कार्यमा संलग्न व्यक्तिहरू पक्राउ परेका हुन्।
पक्राउ पर्नेहरूमा चितवन भरतपुर महानगरपालिका–१५ घर भई हाल काठमाडौं महानगरपालिका–१५ बस्ने ४९ वर्षीया कमला देवी सुनुवार रहेका छन्। उनले क्रोएसिया पठाइदिने भन्दै २ जनाबाट करिब ४ लाख ५० हजार रुपैयाँ ठगी गरेको आरोप छ।
यस्तै सिन्धुली कमलामाई नगरपालिका–७ घर भई हाल काठमाडौं बुढानीलकण्ठ नगरपालिका–४ बस्ने सविना खड्का पनि पक्राउ परेकी छन्। उनले अमेरिका पठाइदिने प्रलोभन देखाई १ जनाबाट १ लाख रुपैयाँ ठगी गरेको प्रहरीले जनाएको छ।
त्यसैगरी काठमाडौं दक्षिणकाली नगरपालिका–४ घर भई हाल टोखा नगरपालिका–११ बस्ने अमर गुरुङ पनि पक्राउ परेका छन्। उनले क्रोएसिया पठाइदिने भन्दै १ जनाबाट ५० हजार रुपैयाँ असुलेको आरोप रहेको छ।
प्रहरीका अनुसार पक्राउ परेकामाथि थप अनुसन्धान भइरहेको छ। साथै वैदेशिक रोजगारीका नाममा हुने ठगीबाट सावधान रहन र आधिकारिक प्रक्रिया मार्फत मात्र विदेश जान प्रहरीले सर्वसाधारणलाई आग्रह गरेको छ।
