काठमाडाैँ । देवघाट गाउँपालिकामा सामाजिक परिचालक, सरसफाई सुपरीवेक्षक र उत्प्रेरक संयोजक पदमा कार्यरत एक व्यक्तिविरुद्ध शैक्षिक योग्यताको नक्कली प्रमाणपत्र पेश गरी जागिर खाएको आरोपमा भ्रष्टाचार मुद्दा दायर गरिएको छ।
अख्तियार दुरुपयोग अनुसन्धान आयोगले जिल्ला तनहुँ, देवघाट गाउँपालिकामा कार्यरत तत्कालीन सामाजिक परिचालक, सरसफाई सुपरीवेक्षक तथा उत्प्रेरक संयोजक होम बहादुर भारतीविरुद्ध विशेष अदालतमा आरोपपत्र दायर गरेको जनाएको छ।
आयोगका अनुसार भारतीले उक्त पद प्राप्त गर्नका लागि शैक्षिक योग्यताको झुट्टा तथा नक्कली प्रमाणपत्र पेश गरेका थिए। त्यसपछि सोही प्रमाणपत्रका आधारमा पदमा बहाल रही उनले ओहदाको हैसियतअनुसार लाभ र सुविधा लिएको आरोप लगाइएको छ।
यसरी नक्कली प्रमाणपत्र पेश गरी सरकारी पदमा नियुक्ति लिएर लाभ लिएको कार्य भ्रष्टाचार भएको ठहर गर्दै आयोगले मुद्दा दायर गरेको जनाएको छ।
आयोगले प्रतिवादी भारतीलाई भ्रष्टाचार निवारण ऐन, २०५९को दफा १६ को उपदफा (१) बमोजिम कसुर कायम गरी सोही ऐनअनुसार कैद र जरिवाना सजाय हुन मागदाबी गरेको छ।
