काठमाडौं । ग्याँस उद्योगीहरूले गुणस्तरहीन सिलिन्डर समेत प्रयोग गर्ने गरेको खुलेको छ । नेपाल गुणस्तर तथा नापतौल विभागले विभिन्न ६ वटा ग्याँस उद्योगमा आइतबार गरेको अनुगमनमा गुणस्तरहीन सिलिन्डर प्रयोग गरेको भेटेको हो ।
अनुगमनका क्रममा कैफियत भेटिएको काठमाडौंका एभरेस्ट ग्याँस उद्योग, धादिङका श्रीकृष्ण, क्याबसन्स र त्रिवेणी ग्याँस उद्योग तथा चितवका भानु र साईबाबा ग्याँस उद्योगसँग विभागले स्पष्टीकरण माग गरेको छ । नेपाल गुणस्तर (प्रमाण चिन्ह) नियमावली २०४० को नियम १५ अनुसार ती उद्योगसँग १५ दिने स्पष्टीकरण सोधिएको विभागका निर्देशक सञ्जिवकुमार ठाकुरले जानकारी दिए ।
बजार अनुगमनका क्रममा सिलिन्डरको हाइड्रोलिक परीक्षण नगरिएको, सफाई तथा सुख्खा नगरिएको तथा खाली सिलिन्डरको तौल नलिएको पाइएको विभागले जनाएको छ । यस्तै, भल्भ मर्मत नगरिएको, चुहावट भएको सिलिन्डर नहटाएको लगायत पाइएको थियो । तोकिएको समयसम्म स्पष्टीकरण पेश नगरे ती उद्योगले थप कानुनी कारवाही भोग्नुपर्ने विभागले जनाएको छ । सौर्य दैनिकबाट
