काठमाडौँ । फागुन–चैतको मधुर घामसँगै काठमाडौँका सडक छेउछाउमा चेरी फूलहरू मुस्कुराउन थालेका छन्। हल्का गुलाबी र सेता फुलहरुले गर्दा व्यस्त सडक पनि केही क्षणका लागि शान्त, काव्यमय र फोटोमैत्री बनेका देखिन्छन्।
उपत्यकाका विभिन्न क्षेत्र—भृकुटीमण्डप, लाजिम्पाट, दरबारमार्ग नक्साल र सिनामंगल सडक खण्डमा रोपिएका चेरीका बोटहरूले अहिले धेरैको ध्यान तानेको छ ।ती बाटो भएर यात्रा गर्नेहरु चेरी फूल मोबाइलमा कैद गर्न एकैछिनका लागि फूलतर्फ फर्किएको देखिन्छ।
जापानदेखि काठमाडौँसम्म
चेरी फूल (साकुरा) लाई वसन्तको प्रतीक मानिन्छ। जापानमा चेरी फूल फुल्ने समयलाई ‘हनामी’ पर्वका रूपमा मनाइन्छ—परिवार, साथीभाइ र समुदाय मिलेर फूल अवलोकन गर्ने सांस्कृतिक परम्पराका रुपमा लिने गरिन्छ ।
काठमाडौँमा पनि पछिल्ला वर्षहरूमा विभिन्न निकाय र दूतावासहरूको सहकार्यमा चेरीका बिरुवा रोप्ने अभियान बढेको छ, जसले शहरको सौन्दर्यसँगै अन्तर्राष्ट्रिय मित्रताको संकेत पनि बोकेको छ।
फोटो- राजबहादुर शाही
