काठमाडौं । फागुन २१ गते हुने प्रतिनिधिसभा सदस्य निर्वाचनका लागि देशभर सुरक्षा व्यवस्था कडा पारिएको छ। मतदानमा सहभागी हुन सर्वसाधारणहरू मंगलबारदेखि नै गृहजिल्ला प्रस्थान गर्न थालेका छन्।
काठमाडौंको माछापोखरी क्षेत्रमा मंगलबार बिहानैदेखि गृहजिल्ला जान सवारीसाधन चढ्न आएका यात्रुहरूको भीड देखिएको थियो। लामो दूरीका बस तथा अन्य सार्वजनिक सवारीसाधनमा यात्रुहरूको चाप बढेको यातायात व्यवसायीहरूले बताएका छन्।
निर्वाचनलाई शान्तिपूर्ण र सुरक्षित रूपमा सम्पन्न गर्न सुरक्षाकर्मीहरूलेविभिन्न स्थानमा गस्ती तीव्र पारेका छन्। नेपाली सेना ले नियमित गस्ती गरेको छ। साथै नेपाल प्रहरी र सशस्त्र प्रहरी बल पनि उच्च सतर्कतामा रहेका छन्।
यसैबीच, निर्वाचन सुरक्षालाई मध्यनजर गर्दै नेपाल–भारत सीमास्थित बेलहिया नाका मंगलबारदेखि बन्द गरिएको छ। सुरक्षा संवेदनशीलतालाई ध्यानमा राख्दै ७२ घण्टा अगावै सीमानाका बन्द गरिएको प्रशासनले जनाएको छ।
निर्वाचनलाई स्वच्छ, निष्पक्ष र भयरहित वातावरणमा सम्पन्न गराउन सम्बन्धित निकायहरू तयारी अवस्थामा रहेको जनाइएको छ।
तस्बिरः रासस
