काठमाडौँ। नेपाली काँग्रेसले मतदाताहरूलाई आफ्नो विवेक प्रयोग गरेर योग्य र इमान्दार उम्मेदवार छनोट गर्न अपिल गरेको छ ।
सोमवार पार्टीले काठमाडौंमा आयोजना गरेको पत्रकार सम्मलेनमा बोल्दै प्रवक्ता देवराज चालिसेले यस्तो अपिल गर्नुभएको हो । प्रत्येक मतले समृद्ध र भ्रष्टाचारमुक्त नेपालको आधार तयार गर्ने भन्दै विवेकपूर्ण निर्णय गर्न उहाँले आग्रह गर्नुभयो ।
प्रवक्ता चालिसेले पार्टीको चुनाव प्रचारको अवस्थाबारे जानकारी दिँदै यस बिचमा विभिन्न राजनीतिक दल परित्याग गरी ५ हजार ८ सय ५३ जना प्रभावशाली नेताहरू नेपाली कांग्रेसमा प्रवेश गरेको उल्लेख गर्नुभयो ।
उहाँले निर्वाचन प्रचारप्रसारको क्रममा कांग्रेसले निर्वाचन आचारसंहिताको पूर्ण पालना गरेको दाबी गर्दै अन्य दलहरूबाट भएका उल्लङ्घनका घटनाप्रति निर्वाचन आयोगको ध्यानाकर्षण गरायो ।
उहाँले भन्नुभयो, ‘निर्वाचन प्रचारका क्रममा तपाईहरुको अद्भूत साथले नेपाली काँग्रेसको विजयको मजबुत जग बसालेको छ । हामी हाम्रा सम्पूर्ण साथिहरु र घरघर पुगेर मत माग्ने साथिहरु तथा स्वयमसेवकहरु, सामाजिक सञ्जालमार्फत सकारात्मक सन्देश फैलाउने युवा साथिहरु, आर्थिक तथा भौतिक सहयोग पुर्याउने शुभेच्छुकहरु परिवारका सदस्यहरु सबैलाई धन्यावाद ज्ञापन गर्दछौँ । तपाईहरुको यो निष्ठा, समर्पण र मेहेनतले हामीलाई थप उत्साहित, जिम्मेवार र उर्जावान बनाएको छ ।
मत भनेको सानो टुक्रा होइन यो भनेको देशको भविष्य निर्माण गर्ने सबैभन्दा शक्तिशाली औजार हो । तपाईहरुको एक मतले समृद्ध, न्यायपूर्ण र समावेशी नेपालको आधार निर्माण गर्नेछ ।
भ्रष्टाचारमुक्त र सुशासनको ढोका खुल्नेछ । राष्ट्रियता र स्वाधिनता र लोकतन्त्रको रक्षा गर्नुका साथै हाम्रो सन्ततिको भविष्यको निर्माणका लागि महत्वपूर्ण जग बसाउनेछ ।’
उहाँले केही स्थानमा आर्थिक प्रलोभन र जिन्सी सामग्री वितरण भइरहेको भन्दै उहाँले सरकार र आयोगलाई निष्पक्ष भूमिका निर्वाह गर्न आग्रह गर्नुभयो ।–न्युज एजेन्सी नेपाल
