काठमाडाैँ । श्रम, रोजगार तथा सामाजिक सुरक्षा मन्त्रालयले मध्यपूर्व तथा खाडी क्षेत्रमा विकसित विषम परिस्थितिलाई ध्यानमा राख्दै त्यहाँ वैदेशिक रोजगारीमा जाने श्रमिकका लागि दिइने श्रम स्वीकृति अस्थायी रूपमा स्थगन गरेको छ।
मन्त्रालयअन्तर्गत वैदेशिक रोजगार विभागले जारी गरेको सूचनाअनुसार साउदी अरेबिया, संयुक्त अरब इमिरेट्स, कतार, कुवेत, बहराइन, ओमान, इराक, यमन, जोर्डन, लेबनन, टर्की तथा इजरायललगायत देशहरूमा वैदेशिक रोजगारीका लागि प्रदान गरिँदै आएको व्यक्तिगत तथा संस्थागत श्रम स्वीकृति अर्को निर्णय नहुँदासम्म रोकिएको हो।
फागुन १७ गते श्रम, रोजगार तथा सामाजिक सुरक्षा मन्त्रालयको मन्त्रिस्तरीय निर्णयअनुसार उक्त देशहरूमा जान चाहने श्रमिकका लागि वैदेशिक रोजगार विभाग तथा अन्तर्गतका निकायबाट प्रदान गरिने श्रम स्वीकृति सेवा हाललाई स्थगन गरिएको विभागले जनाएको छ।
विभागका अनुसार मध्यपूर्व र खाडी क्षेत्रमा देखिएको अस्थिर अवस्था, सुरक्षा चुनौती तथा सम्भावित जोखिमलाई मध्यनजर गर्दै श्रमिकको सुरक्षा र हितलाई प्राथमिकतामा राखी यस्तो निर्णय लिइएको हो। अर्को सूचना जारी नभएसम्मका लागि उक्त निर्णय लागू रहने जनाइएको छ ।
