काठमाडाैँ । पर्वत जिल्लामा भेटेरिनरी अस्पताल तथा पशु सेवा कार्यालयले किसानको गोठमै पुगेर गाईभैँसीमा लाग्ने थुनेलो रोगको परीक्षण सुरू गरेको छ।
व्यावसायिक प्रयोजनका लागि गाईभैँसीपालन गर्ने किसानको उत्पादनमा असर नपरोस् भनी जिल्लाका सातवटै पालिकामा थुनेलो परीक्षण तथा उपचार शिविर सञ्चालन गरिएको हो। कार्यालयले स्थानीय तहसँग सहकार्य गरी व्यावसायिक गाईभैँसीपालकको गोठमा पुगेको र रोग परीक्षणसहित आवश्यक औषधि उपलब्ध गराएको प्रमुख सुरेशकुमार श्रेष्ठले जानकारी दिए।
विहादी, पैँयू, मोदी, जलजला गाउँपालिकाका विभिन्न वडामा गरिएको स्वास्थ्य परीक्षणमा जिल्लाका चार स्थानीय तहका ५०० गाईभैँसी परीक्षणमा राखिएका थिए। परीक्षणमा १५० गाईभैँसीमा थुनेलो रोगको सङ्क्रमण भेटिएको कार्यालयले जनाएको छ।
थुनेलो परीक्षणका साथै गाईबस्तुको गर्भ परीक्षण, कृत्रिम गर्भाधानमा देखिएका समस्या समाधान, र आवश्यक औषधि उपचार गोठमै प्राविधिकले गरेका छन्। रोग लागेका पशुका लागि औषधि निःशुल्क उपलब्ध गराइएको छ। यसरी स्थलगत सेवा पाउँदा किसानहरूले ठूलो राहत महसुस गरेको प्रतिक्रिया दिएका छन्।
जलजला–८ फर्सेका भक्तबहादुर केसीले भने, “पहिले यस्ता रोग लाग्दा उपचार नपाएर भैँसी मासुका लागि बेच्नु पर्ने हुन्थ्यो, अहिले गोठमै सेवा पाएपछि निकै फाइदा भएको छ।”
कार्यालयले दोस्रो चरणको अभियानअन्तर्गत फलेवास नगरपालिका र कुश्मा नगरपालिकाका व्यावसायिक किसान तथा फार्ममा पुगेर गाईबस्तुको उपचार गर्ने योजना रहेको जनाएको छ। हरेक वर्ष दुई चरणमा गाईभैँसी तथा बाख्राको स्वास्थ्य परीक्षण गर्ने परम्परा रहेको छ। पर्वतमा यसअघि सबै पशुलाई पूर्ण खोप लगाइसकिएको कार्यालयले जानकारी दिएको छ।
