काठमाडौँ। आईसीसी टी–२० विश्वकप क्रिकेट सुपर एट समूह १ को खेलमा भारतले जिम्बाबेमाथि फराकिलो जित निकालेको छ ।
खेलमा भारतले जिम्बाबेलाई ७२ रनले हरायो । पराजित भएसँगै जिम्बाबे एक खेलअगावै विश्वकपबाट बाहिरिएको छ । भारतले दिएको २ सय ५७ रनको विशाल लक्ष्य पछ्याएको जिम्बाबेले २० ओभरमा ६ विकेट गुमाएर १ सय ८४ रनमा समेटियो ।
ब्रायन बेनेटले अविजित ९७ रन बनाए पनि जबाफमा आएको जिम्बावेले ६ विकेट गुमाई १ सय ८४ रनमात्र बनाउन सक्यो । बेनेटले ५९ बल खेलि ८ चौका र ६ छक्का प्रहार गरे । कप्तान सिकन्दर राजाले २१ बल खेलि समान २ चौका र छक्काका साथ ३१ तथा टाडिवानासे मारुमानीले २० रन जोडे ।
भारतका अर्शदिप सिंहले ३ विकेट लिए । उनले ४ ओभरमा २४ रनमात्र खर्चेका थिए । वरुण चक्रवर्ती, अक्षर पटेल र शिवम दुबेले १–१ विकेट लिए ।
त्यसअघि टस हारेर पहिले ब्याटिङ गरेको भारतले २० ओभरमा ४ विकेट गुमाएर २ सय ५६ रनको विशाल योगफल खडा गरेको थियो । अभिषेक शर्माले ३० बलमा ५५ रन बनाए भने हार्दिक पान्ड्याले २३ बलमा अविजित ५० रन बनाए । तिलक वर्माले १६ बलमा अविजित ४४ रन बनाए । इशान किशनले ३८, सूर्यकुमार यादवले ३३ तथा सन्जु सामसनले २४ रन बनाए ।
जिम्बाबेका लागि रिचर्ड एनगरभा, सिकन्दर राजा, ब्लेसिङ मुजाराबानी र तिनोतेन्दा मापोसाले १–१ विकेट लिए ।
