काठमाडाैँ । गोरखा सदरमुकामस्थित सिटीहल मतदानस्थलमा एउटा मतदान केन्द्रमा महिला नेतृत्वमा निर्वाचन सञ्चालन हुने भएको छ। मुख्य निर्वाचन अधिकृतको कार्यालयले सिटीहल मतदानस्थलको ‘क’ मतदान केन्द्रलाई मोडल बूथका रूपमा सञ्चालन गर्न मतदान अधिकृतदेखि सबै कर्मचारी, सुरक्षाकर्मी र स्वयंसेवक महिला मात्र खटाएको छ।
मुख्य निर्वाचन अधिकृत विष्णुप्रसाद गौतमका अनुसार सिटीहल मतदानस्थलमा दुई मतदान केन्द्र छन् र यहाँ करिब ७०० मतदाता रहेका छन्। ‘क’ मतदान केन्द्रमा प्रदेश जनस्वास्थ्य कार्यालय गोरखाकी जनस्वास्थ्य प्रशासक सिम्रन काफ्ले नेतृत्व गर्दै छ जना महिला कर्मचारी खटाइएका छन्।
हायक मतदान अधिकृतमा गोरखा जिल्ला अदालतकी नायब सुब्बा देवीकुमारी शर्मा, सहायक कर्मचारीमा बारपाक सुलिकोट गाउँपालिकाकी महिला विकास निरीक्षक इन्दिरा बराल, सामाजिक परिचालक सुनिता थापा र ढुङ्गागाढे आधारभूत विद्यालयकी शिक्षक विनु विक, तथा सहयोगी कर्मचारीमा जिल्ला सरकारी वकिल कार्यालयकी कार्यालय सहायक शान्ता थापा रहेका छन्।
सुरक्षामा पनि महिला प्रहरी परिचालन हुने व्यवस्था गरिएको छ। प्रहरी उपरीक्षक भरत विकका अनुसार महिला प्रहरी सहायक निरीक्षकको नेतृत्वमा निर्वाचन प्रहरी परिचालन हुनेछ। मुख्य निर्वाचन अधिकृत गौतमका अनुसार महिला नेतृत्वको सवलीकरणलाई प्रोत्साहित गर्न जिल्लाभरका ३३३ मतदान केन्द्रमध्ये एउटालाई नमूना मतदान केन्द्रका रूपमा सञ्चालन गर्ने नीति बनाइएको छ।
गोरखामा दुई निर्वाचन क्षेत्रमा २२५ मतदानस्थल रहेका छन् र स्थायी ३३१ तथा अस्थायी २ गरी जम्मा ३३३ मतदान केन्द्र छन्। प्रत्येक मतदान केन्द्रमा कम्तीमा छ जना कर्मचारी खटाइएका छन्, जसअनुसार कुल १,९९२ जना कर्मचारी निर्वाचनमा कार्यरत हुनेछन्। सोमबार र मङ्गलबार ६६६ जना मतदान अधिकृत तथा सहायक मतदान अधिकृतका लागि अभिमुखीकरण कार्यक्रम सम्पन्न गरिएको मुख्य निर्वाचन अधिकृतको कार्यालयले जनाएको छ।
