मनाङ। प्रतिनिधिसभा सदस्य निर्वाचन आउन अब ११ दिन मात्र बाँकी छ । हालसम्म सडक सञ्जालको पहुँच नपुगेको मनाङको नार्पाभूमि गाउँपालिका जाने बाटो बाक्लो हिउँ जमेर बन्द भएको थियो ।
हाल उक्त हिउँ पन्छाएर बाटो खुलाइएको छ । आसन्न निर्वाचनको तयारीका लागि तीनै तहका सुरक्षाकर्मीको टोलीले पाँच दिन खटिएर यहाँको हिउँ पन्छाएको प्रमुख जिल्ला अधिकारी नवराज पौड्यालले जानकारी दिनुभयो ।
मौसमबाहेक मनाङमा अन्य चुनौती नरहेको उहाँले बताउनुभयो । “हामीलाई अप्ठ्यारो भयो भने मौसम नै हो । प्राकृतिक समस्याबाहेक मानव सिर्जित समस्या छैन”, उहाँले भन्नुभयो, “तोकिएकै समयमा निर्वाचन गर्ने तयारीमा छौँ । अन्य कारणले चुनाव रोकिने छैन ।” नार्पाभूमिका पाँच वडामा ४८८ मतदाता छन् ।
बाटो खुले पनि गाउँले गाउँ फर्किएका छैनन् । जाडो छल्न काठमाडौँ, पोखरा बेँसी झरेका अधिकांश मतदाता फर्किने क्रममा रहेको पौड्यालले बताउनुभयो । “अहिले गाउँमा चौँरी गोठाला र केही ज्येष्ठ नागरिक मात्रै हुनुहुन्छ । काठमाडौँ बस्ने मतदाता १४÷१५ गतेतिर गाउँ फर्किने जानकारी प्राप्त भएको छ”, उहाँले भन्नुभयो, “गाउँले नहुँदा हामी पनि जान सक्ने अवस्था छैन । गाउँले फर्किएपछि जाने तयारीमा छौँ ।”
निर्वाचन कार्यालयका प्रमुख निर्वाचन अधिकारी जीवन कुँवरले मतदान अधिकृत र सहायक कर्मचारीलाई तालिम दिएपछि सुरक्षा घेरासहित मतपत्र र मतपेटिका सम्बन्धित मतदान केन्द्रमा पठाउने तयारी भएको उहाँले जानकारी दिनुभयो ।
नार्पाभूमि गाउँपालिकाका अध्यक्ष कोञ्जो तेन्जिङ लामाले मतदातालाई गाउँ फर्काउन प्रयास भइरहेको जानकारी दिनुभयो । “अधिकांश मतदाता काठमाडौँमै हुनुहुन्छ । चौधदेखि १७ गतेसम्ममा सबै मतदाता गाउँ फर्कन अनुरोध गरेका छौँ”, उहाँले भन्नुभयो, “परिवारका एक जना सदस्य अनिवार्य रुपमा फर्कन सुझाव दिएका छौँ ।”
यहाँ नेपाली कांग्रेसबाट टेकबहादुर गुरुङ, नेपाली कम्युनिष्ट पार्टीबाट यशोदा सुवेदी र मङ्गोल नेशनल अर्गनाइजेसनका रामबहादुर घले उम्मेदवार छन् ।
यसअघि एमाले र राप्रपाले समेत उम्मेदवारी दिएकामा कांग्रेसलाई समर्थन गर्दै मनोनयन फिर्ता लिएका थिए । मनाङमा यस निर्वाचनमा महिला तीन हजार ६२३ र पुरुष तीन हजार ३७७ गरी कूल सात हजार मतदाता कायम छन् । २९ मतदान केन्द्र रहेको जिल्ला निर्वाचन कार्यालयले जनाएको छ । रासस
