काठमाडौं। भदौ २४ गते भएको जेनजी आन्दोलनका क्रममा काठमाडौँका विभिन्न कारागारबाट भागको सात जना कैदीबन्दी पक्राउ परेका छन्।
जिल्ला प्रहरी परिसर, काठमाडौँका अनुसार, खोजतलासका क्रममा काठमाडौँका विभिन्न स्थानबाट सात जनालाई पक्राउ गरिएको हो।
पक्राउ पर्नेमा रसुवाको उत्तरगया गाउँपालिका-१ घर भई काठमाडौँको गोकर्णेश्वर नगरपालिका-६ मा बस्ने ४१ वर्षीय तेन्जिङबहादुर तामाङ, लमजुङको दूधपोखरी गाउँपालिका-४ घर भई हाल काठमाडौँको कलंकी बस्ने २० वर्षीय प्रियम गुरुङ र कञ्चनपुरको पुनर्वास नगरपालिका घर भई हाल काठमाडौँको सुन्धारा बस्ने २३ वर्षीया बबिता तामाङ पक्राउ परेका छन् ।
त्यस्तै, काभ्रेपलाञ्चोकको ठाँटी चापखोरीका २२ वर्षीय विक्रम नेपाली, दोलखाको मेलुङ गाउँपालिका-२ का भुवन तामाङ, सिन्धुलीको फिक्कल गाउँपालिका-३ का अनिस मगर र भारतीय नागरिक सरोसन साह पक्राउ परेको जिल्ला प्रहरी परिसर, काठमाडौँका प्रहरी उपरीक्षक (एसपी) पवनकुमार भट्टराईले जानकारी दिनुभयो ।
उनीहरू डाँका चोरी, मानव बेचविखन, लागूऔषध, ज्यान मार्ने उद्योग लगायतका मुद्दामा जेल परेका थिए। एसपी भट्टराईले सातै जनालाई पक्राउ गरेर सम्बन्धित कारागारमा बुझाइएको जानकारी दिनुभयो ।
