काठमाडौं: जिल्ला प्रहरी परिसर काठमाडौंले अख्तियार दुरुपयोग अनुसन्धान आयोगका प्रमुख आयुक्तसहित १० जनालाई ज्यान मार्ने धम्की दिएको आरोपमा एक व्यक्तिलाई पक्राउ गरेको छ।
प्रहरीका अनुसार २०८२ असोज २२ गते आफूलाई “Extremist Group of Nepal (EGN)” को अध्यक्ष बताउँदै इमेलमार्फत अख्तियार प्रमुखसहित अन्य व्यक्तिहरूलाई ज्यान मार्ने धम्की दिई आपराधिक लाभ (एक्स्टोर्सन) लिन खोजिएको थियो। उक्त घटनापछि अनुसन्धान अघि बढाइएको थियो।
काभ्रेपलाञ्चोक जिल्लाको तेमाल गाउँपालिका–१ घर भई हाल फिलिपिन्समा बस्दै आएका ३४ वर्षीय प्रकाश पाठकलाई नेपाल प्रहरी प्रधान कार्यालय, इन्टरपोल शाखाको समन्वयमा NCB Manila, Philippines सँगको सहकार्यमा पक्राउ गरी २०८२ माघ २९ गते काठमाडौं ल्याइएको प्रहरीले जनाएको छ।
प्रहरीले संगठित अपराध निवारण ऐन, २०७० लगायतका कानुनअन्तर्गत अनुसन्धान अघि बढाइएको जानकारी दिएको छ। साथै सार्वजनिक अपराध, विद्युतीय अपराध तथा आपराधिक लाभसम्बन्धी कसुरमा ६ वटा मुद्दा दर्ता गरिएको जनाइएको छ।
प्रवक्ता तथा प्रहरी उपरीक्षक पवनकुमार भट्टराईका अनुसार घटनाबारे थप अनुसन्धान जारी रहेको छ।
