गण्डकी। आसन्न प्रतिनिधिसभा सदस्य निर्वाचनलाई लक्ष्य गरी कास्कीमा मतदानस्थलको अनुगमन गर्ने काम जारी छ । मुख्य निर्वाचन अधिकृतसहित जिल्ला सुरक्षा समितिका पदाधिकारीबाट नियमित रूपमा मतदानस्थलको अनुगमन भइरहेको हो ।
कास्कीका सहायक प्रमुख जिल्ला अधिकारी चित्राङ्गत बरालले सुरक्षाका दृष्टिले अतिसंवेदनशील र संवेदनशील मानिएका मतदानस्थलको अनुगमन गरिएको बताउनुभयो । अनुगमनका क्रममा स्थानीय जनप्रतिनिधि, विद्यालयका प्रधानाध्यापक÷सहायक प्रधानाध्यापक, स्थानीय अगुवासँग मतदानस्थलको वस्तुस्थिति बुझी आचारसंहिताको कार्यान्वयन, भौतिक पूर्वाधार, बिजुली, पानीलगायत सुविधाबारेमा स्थलगत अध्ययन गर्ने गरिएको उहाँले जानकारी दिनुभयो ।
सुरक्षाको प्रबन्ध, सडक पहुँचको अवस्थालगायतको निरीक्षण गरी थप सुधार तथा मर्मतसम्भारका लागि सम्बन्धित निकायमा समन्वय भइरेहेको सहायक प्रजिअ बरालले बताउनुभयो । मतदातालाई सहज रूपमा आवतजावत गर्ने व्यवस्थाका लागि बाटोघाटो मर्मतसुधारका लागि पहल गरिएको छ ।
निर्वाचनलाई स्वच्छ र भयरहित वातावरणमा सम्पन्न गराउन जिल्लामा सुरक्षा रणनीतिसेत तयार गरिएको छ । कास्कीमा नेपाली सेना, सशस्त्र प्रहरी बल र जनपद प्रहरीबाट गरी दुई हजार सुरक्षाकर्मी निर्वाचन सुरक्षामा खटिनेछन् । त्यस्तै, दुई हजार तीन सय तीन जना निर्वाचन प्रहरी परिचालन हुने जनाइएको छ । रासस
