हङ्गेरी। हङ्गेरीका प्रधानमन्त्री भिक्टर ओर्बनले अमेरिकी राष्ट्रपति डोनाल्ड ट्रम्पको शान्ति समिति (बोर्ड अफ पिस) को पहिलो बैठकमा भाग लिन आफू दुई सातापछि वासिङ्टन जाने बताउनुभएको छ।
मूल रूपमा गाजाको पुनर्निर्माणको निरीक्षण गर्ने उद्देश्य राखिएका बोर्डको निर्देशिकाले आफ्नो भूमिकालाई प्यालेस्टाइन क्षेत्रमा सीमित गरेको देखिँदैन र संयुक्त राष्ट्रसङ्घसँग प्रतिस्पर्धा गर्न चाहेको जस्तो देखिन्छ ।
युरोपेली युनियनमा अमेरिकी नेताका नजिकका सहयोगीमध्येका एक नेता ओर्बानले गत महिना डाभोसको स्विस स्की रिसोर्टमा उक्त पहलको सुरुवातमा भाग लिनुभएको थियो ।
“अबको दुई हप्तापछि हामी वाशिङ्गटनमा फेरि भेट्नेछौं, किनकि त्यहाँ ‘बोर्ड अफ पिस’को उद्घाटन बैठक हुनेछ,” उहाँले पश्चिमी शहर सोम्बाथलीमा एक चुनावी कार्यक्रममा भन्नुभयो ।
‘बोर्ड अफ पिस’को स्थायी सदस्यहरूले यसमा सदस्यता प्राप्त गर्न एक अर्ब डलर तिर्नु पर्छ, जसले बोर्ड संयुक्त राष्ट्रसङ्घीय सुरक्षा परिषद्को ‘पे टु प्ले’ संस्करण बन्न सक्छ भनेर आलोचना भइरहेको छ।
युरोपेली सङ्घमा सबैभन्दा लामो समयसम्म राष्ट्रिय नेता रहेका ओर्बानले अप्रिल १२ मा हुने आम निर्वाचनमा अभूतपूर्व चुनौतीको सामना गर्नुपर्नेछ ।
स्वतन्त्र सर्वेक्षणहरूले पूर्व सरकारका भित्री व्यक्तिबाट आलोचक बनेका पिटर मग्यारको नेतृत्वमा विपक्षीहरू स्थिर अर्थतन्त्र र सार्वजनिक सेवाहरूप्रति बढ्दो असन्तुष्टिको साथ अगाडि रहेको देखाएका छन्।(रासस/एएफपी)
