सिरहा। लहान नगरपालिकाले स्थानीय दलित तथा मुसहर समुदायका चार मृतक परिवारलाई काजकिरियाका लागि राहत सामग्रीसहित आर्थिक सहयोग प्रदान गरेको छ ।
नगरपालिकाको नीतिअनुसार नगरप्रमुख महेशप्रसाद चौधरीले आज मृतकका घरमा पुगेर उक्त सहयोग हस्तान्तरण गर्नुभएको हो ।
राहत प्राप्त गर्नेमा लहान–५ का राजेन्द्र मेस्तर, वडा नं १७ का राजकुमार सदाय, वडा नं १८ का तिलियादेवी सदाय र चन्देश्वर सदायका परिवार छन् ।
नगरपालिकाका तर्फबाट प्रत्येक परिवारलाई एक क्विन्टल चामल, तीन किलो दाल, नुन, तेल र एक थान फाइबर सिरक उपलब्ध गराइएको छ । साथै मुसहर समुदायको हकमा काजकिरिया खर्चस्वरूप थप रु पाँच हजार नगद प्रदान गरिने नगर कार्यालयले जनाएको छ ।
सहयोग हस्तान्तरणका क्रममा नगरप्रमुख चौधरीले मृतक परिवारप्रति समवेदना व्यक्त गर्दै नगरपालिका गरिब, विपन्न र दलित समुदायको दुःखमा सधैँ साथमा रहने प्रतिबद्धता जनाउनुभयो । उहाँले पीडित परिवारलाई घर छाउन आवश्यक पर्ने जस्तापाता उपलब्ध गराउने आश्वासन दिनुभयो ।
नगरपालिकाले आगामी दिनमा पनि यस्ता असहाय र विपन्न वर्गलाई लक्षित गरी राहत तथा सहयोगका कार्यक्रमलाई निरन्तरता दिने जनाएको छ । रासस
