काठमाडौँ । नेपाली कांग्रेसभित्र देखिएको आन्तरिक विवाद समाधान गर्ने दिशामा पूर्व सभापति शेरबहादुर देउवा तयार भएका छन्। पछिल्ला केही दिनदेखि दोस्रो तहका नेताहरूले गरिरहेको पहल सहमतिको नजिक पुगेको एक नेताले बताएका छन्।
विशेष महाधिवेशनबाट निर्वाचित पदाधिकारीहरूसँग देउवा पक्षका बालकृष्ण खाण र रमेश लेखक तथा शेखर कोइराला पक्षबाट मिनेन्द्र रिजालले विवाद समाधानका लागि पहल गर्दै आएका थिए। संवादका क्रममा आगामी निर्वाचनमा सहमतिका साथ अघि बढ्न गगन थापा, देउवा र कोइराला पक्ष समेत सकारात्मक भएपछि सहमतिको खाका तयार गर्ने चरणमा नेताहरू पुगेका छन्।
सहमतिको खाका बनाउन कांग्रेस प्रवक्ता देवराज चालिसे र मधु आचार्य, देउवा पक्षका रमेश लेखक तथा कोइराला पक्षका मिनेन्द्र रिजाल महाराजगञ्जमा छलफलमा छन्। सबै पक्षबीच सहमतिमा जाने समझदारी बनेपछि औपचारिक खाका तयार गर्न वार्ता भइरहेको महामन्त्री गुरुराज घिमिरेले जानकारी दिए।
यसैबीच, नेता शेखर कोइरालाले हिजो आफ्नो समूहका नेता–कार्यकर्तालाई सम्बोधन गर्दै निर्वाचनमा एकताबद्ध भएर अघि बढ्न आह्वान गरेका थिए। निर्वाचन आयोगको निर्णयविरुद्ध कानुनी उपचारमा जानु स्वाभाविक भए पनि सडक संघर्षमा जान नहुने अडान कोइरालाले लिएपछि देउवा पक्षका नेताहरू प्रतिरक्षात्मक बनेका थिए।
नवनिर्वाचित सभापति गगन थापा र उनको टिमले पनि देउवा निकटका नेताहरूसँग निरन्तर छलफल गर्दै आएका छन्। सहमतिका लागि आइतबार निर्वाचन आयोगको निर्णयविरुद्ध पूर्व कार्यवाहक सभापति पूर्णबहादुर खड्काले दायर गरेको रिट फिर्ता लिने, टिकट वितरणमा भागबण्डा नगर्ने तर यसअघि जितेका, जित्ने सम्भावना भएका र जनप्रिय नेताहरूलाई टिकट दिने विषयमा सहमतिको प्रयास भइरहेको छ।
पूर्व सभापति देउवा भने अझै अन्तिमपटक निर्वाचन लड्ने आकांक्षामा रहेको बताइएको छ। देउवा आफैंले नचाहेमा बाहेक उनलाई टिकट दिने विषयमा पनि प्रारम्भिक समझदारी बनिसकेको बताइन्छ।
