काठमाडौं । झापा निर्वाचन क्षेत्र नम्बर २ मा पूर्वसभामुख देवराज घिमिरे र पूर्वउपसभामुख इन्दिरा रानामगरबीच रोचक चुनावी प्रतिस्पर्धा हुने भएको छ।
घिमिरे नेकपा एमालेका तर्फबाट उम्मेदवार बनेका छन् भने रानामगरले राष्ट्रिय स्वतन्त्र पार्टी (रास्वपा) बाट टिकट पाएकी छन्।
यसअघि रास्वपाले झापा–२ मा निशा डाँगीलाई उम्मेदवार बनाउने तयारी गरेको थियो। तर, इन्दिरा रानामगरले सुरुदेखि नै यही क्षेत्रबाट चुनाव लड्ने दाबी गर्दै आएकी थिइन्।
पार्टी नेतृत्वले उनलाई उदयपुर–२ बाट उम्मेदवारी दिन प्रस्ताव गरे पनि उनले अस्वीकार गरिन्। अन्ततः डाँगीलाई झापा–१ मा सारेर रानामगरलाई झापा–२ को टिकट दिने निर्णय गरिएको हो। रानामगर र डाँगी दुवै झापा–२ कै बासिन्दा हुन्।
रानामगर यसअघि समानुपातिक प्रणालीबाट सांसद बनेकी थिइन्। रास्वपाकै तर्फबाट उनी प्रतिनिधिसभाको उपसभामुखसमेत बनेकी थिइन्। घिमिरे यसअघिको आमनिर्वाचनमा झापा–२ बाटै निर्वाचित भएका थिए।
