काठमाडौँ । काठमाडौँ महानगरपालिका महानगर प्रहरी बलका नवनियुक्त प्रमुख विष्णु प्रसाद जोशीले औपचारिक रूपमा आफ्नो पदभार ग्रहण गरेका छन्।
पदभार ग्रहण गरेसँगै प्रमुख जोशीले महानगर प्रहरी बलका सिनियर अधिकृतहरूसँग छलफल तथा निर्देशनात्मक बैठक सम्पन्न गरेका छन्।
बैठकमा महानगर प्रहरी बलको वर्तमान अवस्था, कार्यसम्पादन, सेवा प्रवाहलाई थप प्रभावकारी बनाउने उपाय तथा आगामी कार्ययोजनाका विषयमा छलफल गरिएको थियो। प्रमुख जोशीले महानगरको शान्ति, सुरक्षा र अनुशासन कायम गर्न नगर प्रहरीको भूमिका अझ जिम्मेवार र जनमुखी हुनुपर्नेमा जोड दिए।
उनले कानून कार्यान्वयनमा निष्पक्षता, अनुशासन र समन्वयलाई प्राथमिकता दिन निर्देशन दिँदै महानगरपालिकाका नीति तथा कार्यक्रम प्रभावकारी रूपमा कार्यान्वयन गर्न सबै तहका नगर प्रहरी अधिकृतहरूलाई प्रतिबद्ध भएर लाग्न आग्रह गरे।
